.چیئرمین پاکستان تحریک انصاف عمران خان نے اسپیکر قومی اسمبلی کی جانب سے 35ارکان کے استعفے منظورکئے جانے کے بعد تمام حلقوں سے خود الیکشن لڑنے کا اعلان کردیا۔
سیکرٹری جنرل پی ٹی آئی اسدعمر نے ایک انٹرویو میں بتایا کہ ان تمام 35 خالی ہونے والی نشستوں پر تحریک انصاف کے امیدوار عمران خان ہوں گے۔ یہ ایک علامتی الیکشن ہے اصل الیکشن نہیں کہ ہم دیگر امیدوار نامزد کرسکیں۔
اسدعمر نے بتایا کہ جب اسمبلی میں واپسی کا فیصلہ ہوجائے گا تو اس وقت تحریک انصاف کے جتنے ارکان اہل ہوں وہ قومی اسمبلی میں جائیں گے۔ ان کا کہنا تھا کہ اگر اسپیکر ہمیں لیڈر آف اپوزیشن سمیت دیگر پارلیمانی عہدوں سے دور رکھنا چاہتا ہے تو صرف 35 استعفے منظور کرنے سے کام نہیں بنے گا۔
اسدعمر کے مطابق تحریک انصاف کی ساری سینئر قیادت کے استعفے اس خوف کے باعث منظور کیے گئے ہیں کہ انکے اسمبلی میں واپس آنے سے کہیں حکومت نہ گرجائے، حالانکہ اعتماد کا ووٹ انہوں نے لینا ہے ہم نے تو کچھ کرنا نہیں، ہم 35 اسمبلی میں موجود ہوں یا نہ ہوں، اس سے فرق نہیں پڑے گا۔ حکومت کا ایک مقصد یہ بھی ہوسکتا ہے کہ تحریک انصاف کے اہم رہنماں کو صوبائی اسمبلیوں کے الیکشن کے دوران مصروف رکھا جاسکے۔اسد عمر نے کہا کہ تحریک انصاف کے ارکان اسمبلی میں معمول کے کارروائی میں شرکت کے لئے نہیں جارہے، بلکہ ایوان میں جانے کا مقصد آئندہ الیکشن کے لئے ہمارا قائد خزب اختلاف ہونیکی صورت میں وفاقی حکومت کے ساتھ بیٹھ کر نگران حکومت بارے مشاورت کا حصہ بننا ہے۔
لاہور: نئی تازہ مانیٹرنگ
