اسپیکر قومی اسمبلی سردار ایاز صادق نے مالی سال 2025-26 کے وفاقی بجٹ کے لیے قومی اسمبلی کے شیڈول کی منظوری دے دی۔
منظور شدہ شیڈول کے تحت وفاقی بجٹ منگل 10 جون کو قومی اسمبلی میں پیش کیا جائے گا، جبکہ 11 اور 12 جون کو اسمبلی کا اجلاس منعقد نہیں ہوگا۔ بجٹ پر باقاعدہ بحث کا آغاز 13 جون سے ہوگا۔
ایاز صادق نے کہا کہ ایوان میں موجود تمام پارلیمانی جماعتوں کو ضابطے کے مطابق اظہارِ خیال کا موقع دیا جائے گا۔ بجٹ پر بحث 21 جون تک جاری رہے گی، اور اسی روز اسے سمیٹا جائے گا۔ 22 جون کو اجلاس نہیں ہوگا، جبکہ 23 جون کو مالی سال 2025-26 کے لازمی اخراجات پر بحث کی جائے گی۔
انہوں نے بتایا کہ 24 اور 25 جون کو ڈیمانڈز، گرانٹس اور کٹوتی کی تحاریک پر بحث اور ووٹنگ ہوگی، جبکہ 26 جون کو فنانس بل کی منظوری دی جائے گی۔
سپیکر کا کہنا تھا کہ 27 جون کو ضمنی گرانٹس سمیت دیگر امور پر بحث اور ووٹنگ ہوگی، اور قومی اسمبلی کے اس شیڈول میں کسی بھی قسم کی تبدیلی صرف اسپیکر کی اجازت سے کی جا سکے گی۔
