اسلام آباد / باجوڑ( نئی تازہ رپورٹ) وزیراعظم کے معاون خصوصی اور رکن قومی اسمبلی مبارک زیب خان کے گھر پر ایک بار پھر راکٹ حملہ کیا گیا، تاہم خوش قسمتی سے کوئی جانی نقصان نہیں ہوا۔
سیکیورٹی ذرائع کے مطابق حملے میں گھر کے مرکزی دروازے کو جزوی نقصان پہنچا۔ واقعے کے فوری بعد پولیس اور قانون نافذ کرنے والے ادارے جائے وقوعہ پر پہنچ گئے، شواہد اکٹھے کیے گئے اور تفتیش کا آغاز کر دیا گیا۔
ذرائع کا کہنا ہے کہ یہ پہلا موقع نہیں ہے کہ ایم این اے مبارک زیب خان کو نشانہ بنایا گیا ہو، اس سے قبل بھی ان پر حملوں کی کوششیں کی جا چکی ہیں۔ حملے کے بعد علاقے میں سیکیورٹی مزید سخت کر دی گئی ہے، جبکہ پولیس اور حساس ادارے حملہ آوروں کی تلاش میں مصروف ہیں اور مختلف پہلوؤں سے واقعے کی وجوہات کا جائزہ لیا جا رہا ہے۔
یاد رہے کہ مبارک زیب خان رواں سال فروری میں این اے 8 باجوڑ سے آزاد حیثیت میں رکن قومی اسمبلی منتخب ہوئے تھے، جنہیں بعد ازاں وزیراعظم شہباز شریف نے اپنا معاون خصوصی مقرر کیا تھا۔
