پشاور: خیبر پختونخوا میں 7 جون سے 12 جون کے دوران شدید گرمی کی لہر متوقع ہے، جس کے پیش نظر پی ڈی ایم اے نے تمام ضلعی انتظامیہ کو الرٹ جاری کر دیا ہے۔
پی ڈی ایم اے کے مطابق عید کے ایّام میں درجہ حرارت معمول سے 5 سے 7 ڈگری سینٹی گریڈ زیادہ ہو سکتا ہے، خاص طور پر جنوبی اور وسطی علاقوں میں گرمی کی شدت برقرار رہنے کا امکان ہے۔
جاری الرٹ کے مطابق شدید گرمی کے باعث گرد و غبار اور تیز ہوائیں چلنے کا خدشہ ہے، جبکہ خشک موسم کے سبب ہیٹ اسٹروک اور آبی ذخائر پر دباؤ بڑھنے کا بھی امکان ظاہر کیا گیا ہے۔
پی ڈی ایم اے کا کہنا ہے کہ گرمی کی شدت کی وجہ سے پہاڑی علاقوں میں برف پگھلنے کی رفتار تیز ہو سکتی ہے۔ عوام کو غیر ضروری طور پر دھوپ میں جانے سے پرہیز اور پانی کے استعمال میں اضافہ کرنے کی ہدایت کی گئی ہے۔
مراسلے میں کسانوں کو فصلوں کی کٹائی کے دوران احتیاط برتنے اور مویشیوں کا خصوصی خیال رکھنے کی تاکید کی گئی ہے۔
پی ڈی ایم اے نے ہدایت کی ہے کہ عوامی آگاہی مہم کے ذریعے شہریوں کو گرمی کی اس لہر سے باخبر رکھا جائے، بچے صبح 10 بجے سے شام 5 بجے تک دھوپ میں باہر نکلنے سے گریز کریں، اور تمام متعلقہ ادارے ممکنہ ہنگامی صورتحال سے نمٹنے کے لیے تیار رہیں۔
