اسلام آباد( نئی تازہ نیوز) چیئرمین سی ڈی اے محمد علی رندھاوا کی زیر صدارت موٹر اسپورٹس کے فروغ سے متعلق ایک اہم اجلاس منعقد ہوا، جس میں ممبر انجینئرنگ، ممبر پلاننگ و ڈیزائن، ڈی جی بلڈنگ کنٹرول سمیت دیگر اعلیٰ حکام نے شرکت کی۔
اجلاس سے خطاب کرتے ہوئے چیئرمین محمد علی رندھاوا نے کہا کہ سی ڈی اے اسلام آباد میں مختلف کھیلوں کی سہولیات کو فروغ دینے کے لیے سنجیدہ اقدامات کر رہا ہے۔ ان کا کہنا تھا کہ ادارے کا مقصد نہ صرف موٹر اسپورٹس بلکہ دیگر کھیلوں کو بھی فروغ دینا ہے، کیونکہ کھیلیں نہ صرف صحت مند طرزِ زندگی کو فروغ دیتی ہیں بلکہ نوجوانوں کے لیے مثبت اور متحرک سرگرمیوں کا ذریعہ بھی بنتی ہیں۔
انہوں نے مزید کہا کہ موٹر اسپورٹس کی سہولت نوجوانوں میں محفوظ ڈرائیونگ کی مہارتوں کو پروان چڑھانے میں معاون ثابت ہوگی۔ اس موقع پر چیئرمین نے جدید کھیلوں کی سہولیات کی تعمیر و ترقی کی اہمیت پر بھی زور دیا اور کہا کہ موٹر اسپورٹس سماجی رابطوں اور کمیونٹی انگیجمنٹ کا ایک مؤثر پلیٹ فارم مہیا کرتی ہے۔
محمد علی رندھاوا نے یقین دہانی کرائی کہ سی ڈی اے اسلام آباد میں موٹر اسپورٹس کے فروغ کے لیے بنیادی ڈھانچے اور لاجسٹکس کی سہولیات فراہم کرے گا تاکہ عوامی دلچسپی اور ضروریات کو مدِنظر رکھتے ہوئے مکمل سہولیات کی فراہمی یقینی بنائی جا سکے۔
