اسلام آباد: پولیس نے گزشتہ روز اسلام آباد میں قتل کی جانے والی نوجوان ٹک ٹاکر ثناء یوسف کے مبینہ قاتل کو گرفتار کر لیا ہے۔ ملزم کو فیصل آباد سے حراست میں لیا گیا ہے جہاں وہ واردات کے بعد فرار ہو گیا تھا۔
نجی ٹی وی نے پولیس ذرائع کے حوالے سے بتایا کہ ملزم کی شناخت عمر حیات عرف کاکا کے نام سے ہوئی ہے، جو خود بھی ایک ٹک ٹاکر ہے اور اس نے مقتولہ ثناء یوسف سے دوستی کا دعویٰ کیا ہے۔ پولیس نے سی سی ٹی وی فوٹیج اور جدید ٹیکنالوجی کی مدد سے ملزم تک رسائی حاصل کی۔
واضح رہے کہ یہ افسوسناک واقعہ اسلام آباد کے تھانہ سنبل کی حدود سیکٹر جی-13/1 میں پیش آیا جہاں ثناء یوسف کو ان کے گھر پر فائرنگ کر کے قتل کیا گیا۔ پولیس ذرائع کا کہنا ہے کہ ملزم ثناء یوسف سے ان کے گھر پر ملنے آیا تھا اور اسی دوران فائرنگ کر کے اسے قتل کر دیا۔
اس سے قبل ثناء یوسف کی لاش کو پوسٹ مارٹم کے لیے پمز اسپتال منتقل کر دیا گیا تھا جہاں پوسٹ مارٹم مکمل کر لیا گیا ہے۔ پولیس مزید تفتیش کر رہی ہے۔
