مسلم لیگ (ن) کی امیدوار حنا ارشد وڑائچ نے حلقہ پی پی 52 سمبڑیال کے ضمنی الیکشن 2025 میں شاندار کامیابی حاصل کر لی ہے۔ ریٹرننگ آفیسر نے ان کی جیت کا باقاعدہ نوٹیفکیشن جاری کر دیا ہے۔
جاری کردہ نوٹیفکیشن کے مطابق، مسلم لیگ (ن) کی حنا ارشد وڑائچ نے 78 ہزار 702 ووٹ حاصل کر کے میدان مارا۔ ان کے مد مقابل پاکستان تحریک انصاف (پی ٹی آئی) کے حمایت یافتہ امیدوار فاخر نشاط گھمن 39 ہزار 18 ووٹ لے کر دوسرے نمبر پر رہے، جبکہ پاکستان پیپلزپارٹی کے امیدوار راحیل کامران چیمہ 6 ہزار 832 ووٹ حاصل کر سکے۔ تحریک لبیک پاکستان (ٹی ایل پی) کے امیدوار محمد شفاقت نے 4 ہزار 851 ووٹ حاصل کیے۔
واضح رہے کہ یہ نشست مسلم لیگ (ن) کے رکن پنجاب اسمبلی چودھری ارشد وڑائچ کے انتقال کے باعث خالی ہوئی تھی۔
اپنی جیت کے بعد حنا ارشد وڑائچ نے اس کامیابی کو وزیراعلیٰ پنجاب مریم نواز شریف اور اپنے مرحوم والد کے نام کیا۔ جیت کی خوشی میں حنا ارشد وڑائچ کے گھر پر جشن کا سماں تھا، جہاں کارکنوں نے ڈھول کی تھاپ پر بھنگڑے ڈالے اور خوب آتش بازی کی۔
دوسری جانب پی ٹی آئی کے امیدوار فاخر نشاط گھمن نے پی پی 52 کے ضمنی الیکشن میں دھاندلی کا الزام لگاتے ہوئے نتائج تسلیم کرنے سے انکار کر دیا۔ فاخر نشاط کا کہنا تھا کہ پولنگ مکمل ہونے سے پہلے ہی فارم 45 بنا لیے گئے تھے اور اس بار دھاندلی کا طریقہ واردات بدل دیا گیا، جہاں فارم 45 اپنی مرضی سے تیار کیے گئے۔ انہوں نے زور دیا کہ وہ ان دھاندلی زدہ نتائج کو تسلیم نہیں کریں گے اور قیادت کے ساتھ بیٹھ کر آئندہ کا لائحہ عمل طے کریں گے۔
دریں اثنا، الیکشن کمیشن نے پی ٹی آئی کے دھاندلی کے الزامات کو سختی سے مسترد کر دیا ہے اور ثبوت فراہم کرنے کا مطالبہ کیا ہے۔ الیکشن کمیشن نے یقین دہانی کرائی ہے کہ شواہد لانے پر صوبائی الیکشن کمشنر کی جانب سے مکمل کارروائی کی جائے گی۔ اس کے علاوہ، الیکشن کمیشن نے پیپلز پارٹی کے دھاندلی کے الزامات اور انتظامیہ کی جانب سے مختلف پولنگ سٹیشنز کو بند کرنے کی خبروں کو بھی بے بنیاد اور سراسر جھوٹ قرار دیا۔
