لاہور( این این آئی ) یوم اقبال کی مناسبت سے پنجاب اوورسیز پاکستانیز کمیشن میں تقریب کا اہتمام کیا گیا۔ تقریب کے مہمان خصوصی وائس چیئر پرسن پنجاب اوورسیز پاکستانیز کمیشن بیرسٹر امجد ملک تھے۔
اس موقع پر کمشنر پنجاب اوورسیز پاکستانیز کمیشن مرزا نصیر عنایت، ڈائریکٹر جنرل فیصل فرید، سیکرٹری انٹرنیشنل افیئرز پاکستان مسلم لیگ(ن) نور الحسن تنویر اور پنجاب او پی سی کے افسران سمیت مختلف ممالک سے آئے ہوئے نمایاں اوورسیز پاکستانیوں نے شرکت کی۔
وائس چیئرپرسن بیرسٹر امجد ملک نے تقریب سے خطاب کرتے ہوئے کہا کہ مصور پاکستان ڈاکٹر علامہ محمد اقبال نے مسلمانان ہند میں آزادی اور حریت کا جذبہ بیدار کیا،پاکستان کا قیام علامہ اقبال کے خوابوں کی ہی ایک زندہ و جاوید حقیقت ہے۔
بیرسٹر امجد ملک نے پنجاب او پی سی افسران کو علامہ اقبال کے افکار کی روشنی میں اسی جذبے اور لگن سے کام کرنے کی تلقین کی تاکہ دیار غیر میں بسنے والے اوورسیز پاکستانیوں کے مسائل کو فوری حل کرنے کے عمل کو یقینی بنایا جا سکے۔ بعد ازاں وائس چیئر پرسن بیرسٹر امجد ملک نے پنجاب او پی سی افسران کے ہمراہ یوم اقبال کی خوشی میں کیک کاٹا، تقریب کے اختتام پر ملکی ترقی، خوشحالی و استحکام کیلئے خصوصی دعا بھی کی گئی
