جسٹس فائز عیسیٰ پر حملہ،23 پاکستانیوں کے پاسپورٹ معطل ،برطانیہ سے حوالگی کی درخواست

اسلام آباد ( نئی تازہ رپورٹ) سابق چیف جسٹس قاضی فائز عیسیٰ پر حملے کے معاملے میں اہم پیشرفت سامنے آئی ہے، جس کے تحت 23 پاکستانیوں کے نام پاسپورٹ کنٹرول لسٹ (پی سی ایل) میں شامل کرلیے گئے ہیں۔ ان افراد کی حوالگی کے لیے برطانوی حکومت کو باضابطہ خط بھی ارسال کر دیا گیا ہے۔

پی سی ایل میں شامل افراد میں سے کوئی بھی پاکستان واپس آیا، تو اسے گرفتار کر کے ملک میں درج مقدمے میں شامل تفتیش کیا جائے گا۔

ان افراد میں نواز شریف کی لندن رہائش کے باہر احتجاج میں پیش پیش رہنے والے شایان علی اور پی ٹی آئی کی سابق رکن قومی اسمبلی ملائیکہ بخاری کا نام بھی شامل ہے، جو بہن کے علاج کے لیے بیرون ملک روانہ ہوئی تھیں۔

ذرائع کے مطابق اس لسٹ میں سدرہ طارق، حبہ طارق، سعدیہ فہیم، فہیم گلزار، محسن حیدر، ضمیر اکرم، سردار تیمور، ماہین فیصل، وقاص چوہان،محمد پرویز علی اور رخسانہ کوثر جیسے افراد کے نام بھی شامل ہیں۔

اسی طرح مہران حبیب، ظہیر احمد، رحمان انور،شیخ محمد جمیل اور محمد صادق خان کے نام بھی پی سی ایل میں شامل کرلیے گئے ہیں۔

ذرائع کے مطابق خدیجہ کاشف، محمد نوید افضل، سلیمان علی شاہ ، شہزاد قریشی اور بلال انور کے نام بھی اس فہرست میں شامل ہیں۔

مذکورہ 23 افراد کے پاسپورٹس معطل کر دیے گئے ہیں اور برطانوی حکام سے ان کی حوالگی کے لیے باضابطہ درخواست کی گئی ہے۔