اسلام آباد( نئی تازہ رپورٹ) برطانوی چیف آف جنرل سٹاف جنرل سر پیٹرک سینڈرزپاکستان کے تین روزہ دورے پر پہنچ گئے ہیں۔
برطانوی ہائی کمیشن کے بیان کے مطابق جنرل پیٹرک سینڈرز اپنے دورے میں دیگر مصروفیات کے ساتھ پاکستان کے چیف آف آرمی ستاف جنرل عاصم منیر سے بھی ملاقات کریں گے۔
بیان میں بتایا گیا ہے کہ یہ معمول کی دفاعی مصروفیات کا دورہ ہے، دونوں ممالک کے درمیان یہ دفاعی مصروفیات اہمیت کی حامل ہیں،
برطانوی ہائی کمیشن کے مطابق جنرل پیٹرک سینڈرز لاہور میں ہونے والا برطانیہ اور پاکستان کی پولو ٹیموں کا مقابلہ بھی دیکھیں گے۔
ہائی کمیشن کے بیان میں کہا گیا ہے کہ یہ دورہ برطانیہ کے پاکستان کے ساتھ دفاعی تعلقات قائم رکھنے کے عزم کا اظہار ہے، 12 ماہ میں پاکستان اور برطانیہ کے درمیان متعدد دفاعی تبادلے ہوئے ہیں، مشترکہ نیول تربیت اور دونوں ممالک کے درمیان اعلیٰ فوجی دوروں کے تبادلے بھی ہوئے۔
یاد رہے کہ چیف آف جنرل سٹاف سر پیٹرک سینڈرز 6 ماہ قبل بھی پاکستان آئے تھے۔
