اسلام آباد ( نئی تازہ رپورٹ) دو تھانوں کے درمیان حدود کے تنازعہ پر ڈکیتی کیس کا اندراج ایک ہفتہ سے نہیں ہو سکا۔
تفصیلات کے مطابق ایک وفاقی تعلیمی ادارے کے ملازم محمد سرفراز خان کو 21-22 اگست کی درمیانی شب جی ٹی روڈ 26 نمبر کے قریب لوٹ لیا گیا، وہ اسکائی ویز ٹرانسپورٹ کے ذریعے لاہور سے اسلام آباد پہنچے تھے اور جی 11 میں واقع اپنی رہائش گاہ جانے کے لیے ٹیکسی کا انتظار کر رہے تھے کہ سی ڈی 70 موٹرسائیکل پر سوار تین نامعلوم افراد نے انہیں لوٹ لیا۔
پستول سے مسلح افراد نے شہری سے 90 ہزار روپے مالیت کا موبائل فون، اور ایک پرس چھین لیا جس میں اس کا شناختی کارڈ، دو بینک کارڈز، ڈرائیونگ لائسنس، ہونڈا سٹی کے لیے گاڑی کا رجسٹریشن کارڈ، سروس کارڈ، اور 20 ہزار روپے کی نقد ی موجود تھی۔ متاثرہ شہری کے مطابق ملزمان کی عمریں 18 سے 20 سال کے درمیان معلوم ہوتی تھیں اور وہ شلوار قمیض میں ملبوس تھے۔
شہری نے پولیس کو ڈکیتی کی اطلاع دی، لیکن پولیس نے موقف اختیار کیا ڈکیتی دوسرے تھانے کی حدود میں ہوئی ہے۔ ایک ہفتہ گزرنے کے باوجود مقدمہ کا اندراج نہیں ہو سکا۔شہری نے اعلیٰ حکام سے نوٹس لے کر مقدمہ درج کرنے کی اپیل کی ہے۔
