اسلام آباد ( نئی تازہ رپورٹ) گورنرخیبر پختونخوا نے صدر مملکت سے ایوان صدر میں ملاقات کے بعد صوبے میں انتخابات کے لئے 28 مئی کی تاریخ دے دی۔
میڈیا رپورٹ کے مطابق صدر مملکت ڈاکٹر عارف علوی کی دعوت پر گورنر خیبرپختونخوا حاجی غلام علی نے منگل کو ایوان صدر میں صدر مملکت سے ملاقات کی ، ملاقات میں انتخابات کے انعقاد سے متعلق امور پر تبادلہ خیال کیا گیا۔
صدر مملکت اور گورنر کے درمیان آئین کے آرٹیکل 224 (2) اور یکم مارچ کے سپریم کورٹ کے حکم کی روشنی میں الیکشن کے حوالے سے اہم بات چیت ہوئی۔ صدر نے گورنر کو مشورہ دیا کہ وہ الیکشن کمیشن سے مشاورت کے بعد انتخابات کی تاریخ کے حوالے سے سپریم کورٹ کے حکم پر عمل درآمد کریں۔
ڈاکٹر عارف علوی کا کہنا تھا کہ کسی پیچیدگی سے بچنے کے لیے سپریم کورٹ کے فیصلے کے مطابق انتخابات کی تاریخ مقرر کی جائے۔کیونکہ تقریباً 2 ہفتے گزر گئے ہیں۔
صدر سے ملاقات کے بعد گورنر حاجی غلام علی نے خیبر پختون خوا میں الیکشن کے لئے 28 مئی کی تاریخ دے دی ہے۔
میڈیا سے گفتگو میں انہوں نے اس تاریخ کا اعلان کیا اور کہا کہ ہمیں اپنی آئینی ذمہ داری پوری کرنی ہے، سوبے میںمیں 28 تاریخ کو انتخابات کے انعقاد کی تاریخ تجویز کردی ہے ، جبکہ صوبے میں امن و امان اور سیکیورٹی صورتحال سے متعلق الیکشن کمیشن کو آگاہ کردیا ہے۔
اس موقع پران سے سوال کیا گیا کہ کیا خیبرپختونخوا میں حالات سازگار ہیں ؟ جس پر گورنر نے جواب میں کہا کہ حالات سب کے سامنے ہیں، مردم شماری کی ٹیموں پر حملہ کیا گیا ہے، آپ سوچیں انتخابی مہم کیسے چلے گی؟
