اسلام آباد ( نئی تازہ ڈیسک) وفاقی دارالحکومت کے پاکستان انسٹی ٹیوٹ آف میڈیکل سائنسز (پمز) کے مدر اینڈ چائلڈ ہیلتھ (ایم سی ایچ) بلاک کی تیسری منزل پر واقع نرسری میں بدھ کی صبح ایئر کنڈیشنر کمپریسر پھٹنے سے خوفناک آگ بھڑک اٹھی جس کے نتیجے میں 15 نومولود بچے جاں بحق ہو گئے۔
ریسکیو ذرائع اور ہسپتال انتظامیہ کے مطابق واقعہ صبح پونے 7 بجے شارٹ سرکٹ کی وجہ سے اے سی کمپریسر میں دھماکے کے باعث پیش آیا، جس نے منٹوں میں پوری نرسری کو اپنی لپیٹ میں لے لیا۔ آتشزدگی کے وقت نرسری میں 16 بچے موجود تھے جن میں سے ڈیوٹی ڈاکٹر صرف ایک بچے کو بحفاظت نکالنے میں کامیاب ہو سکیں جبکہ باقی 15 بچے دم گھٹنے اور شدید جھلسنے سے دم توڑ گئے۔
اطلاع ملتے ہی فائر بریگیڈ کی 6 گاڑیوں اور 4 ایمبولینسز نے موقع پر پہنچ کر فائر فائٹنگ آپریشن مکمل کیا اور آگ پر قابو پا کر کولنگ کا عمل شروع کر دیا۔ وزیراعظم شہباز شریف نے واقعے کا فوری نوٹس لیتے ہوئے ذمہ داران کا تعین کرنے کی ہدایت کی ہے جبکہ ضلع انتظامیہ نے ایڈیشنل ڈپٹی کمشنر کی سربراہی میں اعلیٰ سطحی تحقیقاتی کمیٹی قائم کر دی ہے۔
