کراچی ( نئی تازہ ڈیسک) کراچی کے علاقے ہجرت کالونی میں 13 سالہ بچی کی شادی کی کوشش کو پولیس اور وومن چائلڈ پروٹیکشن سیل نے مشترکہ کارروائی کے دوران ناکام بنا دیا۔ اس واقعے میں بچی کے والدین سمیت دیگر افراد کو گرفتار کر کے مقدمہ درج کر لیا گیا۔
ڈسٹرکٹ ساؤتھ پولیس کے ترجمان کے مطابق وومن چائلڈ پروٹیکشن سیل کو اطلاع ملی کہ کم عمر بچی کا نکاح کرانے کی تیاری ہو رہی ہے۔ فوری طور پر ایس ایس پی ساؤتھ مطہور علی کو اطلاع دی گئی، جن کی ہدایت پر سول لائن پولیس اور وومن چائلڈ پروٹیکشن سیل نے کارروائی کرتے ہوئے موقع پر پہنچ کر صورت حال کا جائزہ لیا۔
ابتدائی تحقیقات میں ثابت ہوا کہ بچی کی عمر صرف 13 سال ہے، جس کی سرکاری دستاویزات سے بھی تصدیق ہوئی۔ پولیس نے لڑکی کا بیان اور دیگر شواہد حاصل کرنے کے بعد والدین اور نکاح میں شامل دیگر افراد کو حراست میں لے کر مقدمہ درج کر لیا ہے۔
میڈیا رپورٹ کے مطابق ایس ایس پی ساؤتھ نے ایک بیان میں کہا ہے کہ بچوں کے حقوق اور تحفظ کے لیے پولیس ایسے غیر قانونی اقدامات کے خلاف بلا تفریق کارروائی جاری رکھے گی۔
