وزیرِ اعلیٰ خیبر پختونخوا علی امین گنڈا پور نے کہا ہے کہ اگلے سال سے صوبے کے تمام سرکاری اعلیٰ تعلیمی اداروں میں فیسیں نصف کر دی جائیں گی۔
پشاور میں وزیراعلیٰ ہاؤس میں منعقدہ اسکالرشپس کی تقسیم کی تقریب سے خطاب کرتے ہوئے علی امین گنڈاپور نے چیف منسٹر ایجوکیشن انڈومنٹ فنڈ کی رقم میں 1.2 ارب روپے سے بڑھا کر 2.4 ارب روپے کرنے کا اعلان کیا، انہوں نے کہا کہ صوبائی حکومت کا یہ عزم ہے کہ اگلے مالی سال سے تمام سرکاری یونیورسٹیوں اور کالجوں میں فیسوں کو آدھا کر دیا جائے گا، اور اس مقصد کے لیے صوبے کی آمدن میں اضافے کے لیے مختلف اقدامات اٹھائے جا رہے ہیں۔
وزیرِ اعلیٰ نے بتایا کہ گزشتہ 9 ماہ کے دوران صوبے کی آمدن میں 44 فیصد کا غیر معمولی اضافہ ہوا ہے، جبکہ بچیوں اور یتیم بچوں کو بارہویں جماعت تک مفت تعلیم فراہم کرنے کے لیے دو ارب روپے کی مالیت پر مشتمل انڈومنٹ فنڈ قائم کیا گیا ہے۔ وزیرِ اعلیٰ نے کہا کہ صوبائی حکومت کا مقصد اپنے بچوں کو بہترین تعلیم فراہم کر کے ان کا مستقبل روشن بنانا ہے۔
علی امین گنڈا پور نے اس عزم کا اظہار کیا کہ صوبائی حکومت نوجوانوں کی ہر سطح پر مکمل مدد کرے گی تاکہ وہ اپنے خوابوں کو حقیقت میں بدل سکیں۔
وزیرِ اعلیٰ نے اعلان کیا کہ چیف منسٹر ایجوکیشن انڈومنٹ فنڈ کی رقم بڑھا کر 2.4 ارب روپے کر دی گئی ہے۔
بتایا گیا ہے کہ اب تک چیف منسٹر ایجوکیشن انڈومنٹ فنڈ کے تحت 615 ملین روپے کی رقم سے 526 طلبہ کو اسکالرشپس دی جا چکی ہیں، جن میں 366 انڈرگریجویٹس اور 150 گریجویٹس شامل ہیں۔
