اسلام آباد ( نئی تازہ رپورٹ) الیکشن کمیشن آف پاکستان نے پی ٹی آئی کو بلے کا انتخابی نشان دینے سے متعلق پشاورہائیکورٹ کے فیصلے کےخلاف سپریم کورٹ میں اپیل دائرکر دی۔
ای سی پی نے درخواست میں پشاورہائیکورٹ کا فیصلہ کالعدم قرار دینے کی استدعا کرتے ہوئے کہا ہے کہ تحریک انصاف نے انٹراپارٹی انتخابات الیکشن ایکٹ کے مطابق نہیں کرائے۔
یاد رہے کہ پشاورہائیکورٹ نے بدھ کو الیکشن کمیشن کا فیصلہ معطل کرتے ہوئے پی ٹی آئی کو بلے کا نشان واپس دینے کا حکم دیا تھا۔
دوسری جانب پی ٹی آئی نے پارٹی سرٹیفکیٹ جاری نہ کرنے پر الیکشن کمیشن کے خلاف پشاور ہائی کورٹ میں توہین عدالت کی درخواست دائر کردی ہے۔ ہائی کورٹ میں دائر کی گئی درخواست میں چیف الیکشن کمشنر، سیکرٹری الیکشن کمیشن اور ارکان الیکشن کمیشن کو فریق بنایا گیا ہے۔
درخواست قاضی انور اور شاہ فیصل الیاس کی وساطت سے دائرکی گئی ہے جس میں مؤقف اپنایا گیا ہے کہ عدالتی احکامات کے باوجود الیکشن کمیشن نے پی ٹی آئی کو سرٹیفکیٹ جاری نہیں کیا، جبکہ الیکشن کمیشن آف پاکستان کی ویب سائٹ پر بھی پارٹی سرٹیفکیٹ شائع نہیں کیا گیا۔
درخواست کے مطابقای سی پی عدالتی فیصلے سے باخبر ہے، واضح عدالتی احکامات کے باوجود فریقین پی ٹی آئی کے عام انتخابات کی راہ میں رکاوٹ پیدا کر رہے ہیں۔ یہ اقدام توہین عدالت کے زمرے میں آتا ہے۔
