اسلام آباد( نئی تازہ رپورٹ) آئی ایم ایف ایگزیکٹو بورڈ نے پاکستان کے اقتصادی جائزے اور اسٹینڈ بائی ارینجمنٹ معاہدہ کی منظوری د یتے ہوئے 70 کروڑڈالر کی قسط جاری کرنے کا فیصلہ کیا ہے ۔
وزارتِ خزانہ کی جانب سے جاری کردہ بیان کے مطابق عالمی مالیاتی فنڈ (آئی ایم ایف) کےایگزیکٹو بورڈ نے پہلےاقتصادی جائزے کی منظوری دیدی ہے، بورڈ نے پاکستان کو 70 کروڑڈالر کی اگلی قسط جاری کرنے کا فیصلہ کیا ہے.
آئی ایم ایف کے مطابق یہ رقم تین ارب ڈالر کے اسٹینڈ بائی ارینجمنٹ کے تحت جاری کی جائے گی،پاکستان کو نو ماہ کے پروگرام کے تحت 1 ارب 20 کروڑڈالر پہلے ہی جاری کیے جا چکے ہیں، اس طرح اگلی قسط ملنے کے بعد پاکستان کو اسٹینڈ بائی انتظام کے تحت ملنے والی کل رقم ایک ارب نوے کروڑ ڈالر ہوجائے گی ۔
فروری میں متوقع آخری اقتصادی جائزہ مکمل ہونے پر پاکستان کو مزید ایک ارب 10 کروڑ ڈالر ملیں گے.
واضح رہے کہ پاکستان اورآئی ایم ایف کے درمیان اسٹاف لیول معاہدہ 15 نومبر2023 کو طے پایا تھا.
