اسلام آباد( نئی تازہ رپورٹ) الیکشن کمیشن نے الیکشن 2024 کی تیاریوں کے سلسلے میں ڈسٹرکٹ ریٹرننگ آفیسرز اور ریٹرننگ آفیسرز کی تعیناتی کا نوٹی فکیشن جاری کردیا ہے۔
ای سی پی کے ترجمان کی جانب سے جاری بیان میں کہا گیا ہے کہ عام انتخابات 2024 کے لئے الیکشن کمیشن نے ڈسٹرکٹ ریٹرننگ آفیسرز، ریٹرننگ آفیسرز اور اسسٹنٹ ریٹرننگ آفیسرز کی تعیناتی کا نوٹیفکیشن جاری کیا ہے۔
قومی اور صوبائی اسمبلی کے 859 حلقوں کیلئے آر اوز، ڈی آر اوز اور اے آر اوز تعینات کردیے گئے۔ نوٹی فکیشن کے مطابق وفاقی دارالحکومت کیلئے ڈپٹی کمشنر اسلام آباد کو ڈسٹرکٹ ریٹرننگ آفیسرتعینات کیا گیا ہے، خیبرپختونخوا میں قومی و صوبائی اسمبلی کی نشستوں کیلئے 36 ڈسٹرکٹ ریٹرننگ آفیسرز تعینات کیے گئے ہیں۔
پنجاب میں قومی اور صوبائی اسمبلی کی نشستوں کیلئے 41 ڈسٹرکٹ ریٹرننگ آفیسرز کی تعیناتی کی گئی ہے، الیکشن کمیشن نے سندھ میں قومی و صوبائی اسمبلی کی نشستوں کیلئے 30 ڈسٹرکٹ ریٹرننگ آفیسرز تعینات کیے ہیں جبکہ بلوچستان میں قومی و صوبائی اسمبلی کی نشستوں کیلئے 36 ڈسٹرکٹ ریٹرننگ آفیسرزکو تعینات کیا گیا ہے۔
الیکشن کمیشن آف پاکستان نے قومی اسمبلی کی نشستوں کیلئے 266 ریٹرننگ اور اسسٹنٹ ریٹرننگ آفیسرز تعینات کردیے ہیں۔ خیبرپختونخوا سے قومی اسمبلی کی نشستوں کیلئے 45 ریٹرننگ اور اسسٹنٹ ریٹرننگ آفیسرز، اسلام آباد سے قومی اسمبلی کی نشستوں کیلئے 3 ریٹرننگ آفیسر، اور اسسٹنٹ ریٹرننگ آفیسرز تعینات کر دیئے گئے ہیں۔
پنجاب سے قومی اسمبلی کی نشستوں کیلئے 141 ریٹرننگ آفیسر اور اسسٹنٹ ریٹرننگ آفیسرزای سی پی کی طرف سےتعینات کیے گئے ہیں، سندھ سے قومی اسمبلی کی نشستوں کیلئے 61 ریٹرننگ آفیسرز، اور اسسٹنٹ ریٹرننگ آفیسرز جبکہ بلوچستان سے قومی اسمبلی کی نشستوں کیلئے 16 ریٹرننگ آفیسر، اور اسسٹنٹ ریٹرننگ آفیسرز کو تعینات کردیا گیا۔
بیان کے مطابق الیکشن کمیشن نے قومی و صوبائی اسمبلیوں کی مخصوص نشستوں کیلئے 8 ریٹرننگ آفیسرز تعینات کردیے۔
نوٹی فکیشن کے مطابق الیکشن 2024 میں ڈپٹی کمشنرز ڈسٹرکٹ ریٹرننگ افسر کے فرائض سرانجام دیں گے، قومی و صوبائی اسمبلی کے تمام حلقوں کےلئے الگ الگ ریٹرننگ افسر تعینات کئے گئے ہیں۔
نوٹی فکیشن کے مطابق الیکشن ڈیوٹی دینے والے افسران کے تبادلوں پ پابندی ہوگی۔
الیکشن کمیشن کے الیکشن ونگ میں بھی تعطیلات ختم کردی گئی ہیں، آئندہ مرحلے میں الیکشن کمیشن انتخابی شیڈول کا اعلان کرے گا اور آئندہ ہفتے سے ریٹرننگ افسران کیٹریننگ کا مرحلہ شروع ہوگا۔
ملک بھر میں 38 مقامات پر ریٹرننگ افسران کی ٹریننگ ہو گی۔ ریٹرننگ افسران کی ٹریننگ کے بعد پولنگ اسکیم مکمل کی جائے گی۔
