الیکشن کمیشن آف پاکستان نے مسلم لیگ ن کو حتمی شوکاز نوٹس جاری کرتے ہوئے انٹراپارٹی الیکشن کیلئے ایک ہفتے کی حتمی مہلت دی ہے۔
انٹرپارٹی انتخابات کے حوالے سے الیکشن کمیشن میں چیف الیکشن کمشنر سکندر سلطان راجا کی سربراہی میں 3 رکنی بینچ نے سماعت کی۔
مسلم لیگ ن کی جانب سے وکیل ارشد جدون پیش ہوئے۔
اس موقع پر الیکشن کمیشن کے بینچ نے وکیل کو مخاطب کرتے ہوئے کہا کہ مسلم لیگ ن نے یقین دہانی کرائی تھی کہ 30 دسمبرتک انٹرا پارٹی الیکشن ہو جائیگا۔ جس پر پارٹی کے وکیل نے کہا کہ 30 دسمبر کو انٹرا پارٹی الیکشن نہیں کراسکے۔ اب 31 جنوری کو کرادیں گے، احسن اقبال نے اس بارے میں درخواست الیکشن کمیشن میں جمع کرائی ہے، آخری موقع دیا جائے۔
چیف الیکشن کمشنر نے ریمارکس دیئے کہ جو جماعت اپنے الیکشن نہ کراسکے وہ باقی الیکشن کیا کرائے گی۔ آپ کا انتخابی نشان منسوخ کرنا چاہیے، پھرہی انٹرا پارٹی الیکشن کرائیں گے۔
انہوں نے مسلم لیگ ن کو سات روز کا حتمی شوکاز نوٹس جاری کرنے کا حکم دیتے ہوئے کہا کہ اس کے بعد انتخابی نشان واپس لینے کا شوکاز نوٹس جاری کیا جائے گا
