اسلام آباد( نئی تازہ رپورٹ) شہریوں کے لیے پاسپورٹ کے اجرا میں جانچ پڑتال کا عمل بڑھا دیا گیا ہے، اب نارمل پاسپورٹ 10 روز کی بجائے 21 روز میں جاری کیا جائے گا۔
ذرائع کے مطابق محکمہ امیگریشن اینڈ پاسپورٹ نے کہا ہے کہ پاسپورٹ کے غیرقانونی استعمال کی وجہ سے اس کا جلد اجرا مشکل ہوگیا ہے، اس سلسلہ میں شر پسند مافیا کی کارروائیوں کا حوالہ دیا گیا ہے۔
محکمہ پاسپورٹ کے ذرائع کے مطابق پاسپورٹ کے اجرا میں احتیاط اور جانچ پڑتال کا عمل بڑھا دیا گیا ہے، نئی صورتحال میں اب نارمل پاسپورٹ 21 روز میں جاری ہو گا جو پہلے 10 روز میں ہوتا تھا۔
اسی طرح ارجنٹ پاسپورٹ کا اجرااب 4 کی بجائے 5 روز میں ہوگا، تاہم فاسٹ ٹریک پاسپورٹ کا اجرا پہلے کی طرح 2 دفتری روز میں کیا جائےگا۔
یاد رہے کہ رواں برس اپریل میں پاسپورٹ اجرا کا دورانیہ کم کیا گیا تھا جسے اب پھر سے بڑھا دیا گیا ہے۔
محکمہ امیگریشن اینڈ پاسپورٹ کے مطابق پاسپورٹ دفاتر صبح 8 بجے سے دوپہر ایک جبکہ جمعے کو صبح 8 بجے سے دوپہر 12 بجے تک کھلیں گے ۔
محکمہ پاسپورٹ نے عوام سے پاسپورٹ کے اجرا میں عوام سے تعاون کی اپیل کی ہے، اور کہا ہے کہ پاسپورٹ کے حصول میں مشکلات پر سٹیزن پورٹل میں شکایت درج کرائیں اور ڈائریکٹر جنرل کے ہیلپ لائن نمبر پررابطہ کریں جو یہ ہے۔
051-111-344-777
