پشاور ( نئی تازہ رپورٹ) تین شہروں کی پولیس نے مشترکہ کارروائی کرتے ہوئے پانچ لاکھ ڈالرز تاوان کیلیے اغوا کیے گئے تاجر کو بازیاب کروا لیا ۔
تفصیلات کے مطابق تاجر حاجی اکرام کو پشاور میں صدر کے علاقہ سے نامعلوم افراد اغوا کر کے لے گئے تھے اور اہل خانہ سے رہائی کے بدلے پانچ لاکھ ڈالرز تاوان طلب کیا تھا۔
حاجی اکرام کے اہل خانہ نے اغوا کے بارے میں پولیس کو آگاہ کیا اور تاوان کیلیے جس نمبر سے کال آئی تھی وہ بھی پولیس کو فراہم کیا۔ سی سی پی او پشاور کے مطابق پولیس نے انٹیلی جنس کی بنیاد پر نوشہرہ میں کارروائی کر کے تاجر کو بازیاب کروایا۔
کارروائی میں نوشہرہ اور مردان کی پولیس نے بھی حصہ لیا، جس کے نتیجے میں دو اغوا کاروں کو بھی گرفتارکر لیا گیا ہے۔
