اسلام آباد( نئی تازہ رپورٹ) نگران وزیر اطلاعات و نشریات مرتضیٰ سولنگی نے معیشت کی بہتری کو نگران حکومت کی پہلی ترجیح قرار دیتے ہوئے کہا ہے کہ وفاقی کابینہ ملک میں آزادانہ، منصفانہ اور پُرامن انتخابات کے لیے پُرعزم ہے۔
جمعہ کونگران وفاقی کابینہ کے اجلاس کے بعد میڈیا بریفنگ کے دوران نگران وزیر اطلاعات نے کہا کہ کابینہ کا پہلا اجلاس آج نگران وزیراعظم کی زیر صدارت ہوا، نگران حکومت کی پہلے ترجیح معیشت کو بہتر کرنا ہے، کابینہ کو سرکاری اخراجات کو کم کرنا ہے۔ انہوں نے کہا کہ آئین اور قانون کے تحت نگران حکومت کی جو بھی ذمہ داریاں ہیں وہ پوری کریں گے، وفاقی کابینہ ملک میں آزادانہ، منصفانہ اور پُرامن انتخابات کے لیے پُرعزم ہے۔
وزیر اطلاعات نے بتایا کہ کابینہ اجلاس کے بعد چیف الیکشن کمشنر سے ملاقات ہوئی، چیف الیکشن کمشنر نے ہمیں مکمل تعاون کی یقین دہانی کرائی ہے۔
وزیر اطلاعات مرتضیٰ سولنگی نے بتایا کہ نگران وزیر اعظم انوار الحق کاکڑ نے کابینہ کے ہر رکن سے اس کی وزارت کے بارے میں بریفنگ لی، وزیر اعظم کی ہدایت ہے کہ اخراجات کم کیے جائیں، کابینہ کے اجلاس میں معیشت کی بحالی کے لیے کمیٹی قائم کردی گئی ہے۔ انہوں نے کہا کہ پٹرولیم مصنوعات مہنگی خرید کر سستا فروخت کرنے کے متحمل نہیں ہوسکتے۔
وزیر اطلاعات نے کہا کہ ہماری پوری کوشش ہوگی کہ اپنے حلف کی پاس داری کریں اور ذمہ داریاں آئین اور قانون کے مطابق انجام دیں۔ انہوں ںے کہا کہ ریاست کی طاقت اقلیتوں کے ساتھ ہے، تمام شہریوں کو برابر انسانی حقوق حاصل ہیں، جڑانوالہ واقعے پر ہر فرد نے دکھ اور افسوس کا اظہار کیا ہے۔ انہوں نے بتایا کہ وفاقی کابینہ نے ملک میں صوفی ازم کو فروغ دینے پر زور دیا ہے۔
۔
