راولپنڈی ( نئی تازہ رپورٹ) باجوڑ میں سیکیورٹی فورسزکے آپریشن میں 4 دہشتگردمارے گئے جبکہ ایک دہشت گرد کو گرفتار کر لیا گیا۔فاعرنگ کے تبادلے میں24 سالہ سپاہی محمد شعیب شہید ہو گیا۔
پاک فوج کے شعبہ تعلقات عامہ آئی ایس پی آر کے بیان کے مطابق سکیورٹی فورسز نے باجوڑ کے علاقے چارمنگ میں دہشتگردوں کی موجودگی کی خفیہ اطلاع پر 12 اور13 اگست کی درمیانی شب آپریشن کیا۔
بیان میں کہا گیا ہے کہ فائرنگ کے تبادلے میں 4 دہشتگرد ہلاک ہوگئے جبکہ سیکیورٹی فورسز نے ایک دہشتگرد کو گرفتار کر لیا۔
پاک فوج کے شعبہ تعلقات عامہ کے مطابق ہلاک اور گرفتار دہشتگرد سکیورٹی فورسز کے خلاف دہشتگردانہ کارروائیوں میں ملوث تھے، اور بےگناہ شہریوں کے قتل اور خودکش دھماکوں میں بھی سرگرم تھے۔
آئی ایس پی آر کے مطابق دہشتگردوں کے ساتھ فائرنگ کے تبادلے میں 24 سالہ سپاہی محمد شعیب شہید ہو گیا۔
بیان کے مطابق دہشتگردوں کے خاتمے کے لیے علاقے میں کلیئرنس آپریشن جاری ہے جبکہ افواج نے پاکستان سے دہشتگردی کے خاتمے کاعزم رکھا ہے۔
