اسلام آباد ( نئی تازہ رپورٹ) وزیراعظم شہباز شریف اور اپوزیشن لیڈر راجہ ریاض نے نگران وزیراعظم کے لیے انوار الحق کاکڑ کے نام پر اتفاق کرلیا ۔ ایڈوائس صدر پاکستان نے دستخط کردیے ۔
وزیراعظم شہباز شریف سے ملاقات کے بعد صحافیوں سے گفتگوکرتے ہوئے قومی اسمبلی کے سبکدوش اپوزیشن لیڈرراجا ریاض نے کہا کہ سب سے پہلے ہم اس بات پر متفق ہوئے کہ جو بھی وزیراعظم ہو وہ چھوٹے صوبے سے ہو، تاکہ چھوٹے صوبے کی محرومی دور ہو، اور ایسا نام ہو جو غیرمتنازع ہو۔
راجا ریاض نے کہا کہ فیصلہ ہوا ہے کہ باقی پانچ نام ہم کسی کو نہیں بتائیں گے،یہ نام میں نے دیا تھا، اس کی بنیادی یہ ہے کہ ان کا تعلق چھوٹے صوبہ بلوچستان سے ہے۔
راجا ریاض نےکہا کہ سینیٹر انوار الحق کاکڑ کے نام پر میں نے اور وزیراعظم نے دستخط کر دیے ہیں، امید ہے کہ وہ کل تک حلف اٹھا لیں گے۔
ادھرسرکاری ٹی وی کے مطابق وزیرِ اعظم اور قائد حزب اختلاف نے مشترکہ طور پر دستخط کرکے ایڈوائس صدر پاکستان کو بھجوا دی ہے۔
واضح رہے کہ سینیٹر انوار الحق کاکڑ کا تعلق بلوچستان عوامی پارٹی (بی اے پی) سے ہے، وہ مارچ 2018 میں سینیٹ کے رکن منتخب ہوئے تھے۔
تازہ اطلاعات کے مطابق صدر مملکت عارف علوی نے نگران وزیراعظم کے لیے بھیجی گئی سمری پر دستخط کردیے ہیں۔
ترجمان ایوان صدرکے مطابق انوارالحق کاکڑ کی بطور نگران وزیراعظم تعیناتی کی منظوری آئین کےآرٹیکل 224 ایک اےکے تحت دی ۔
