دبئی ( نئی تازہ رپورٹ) انٹرنیشنل کرکٹ کونسل (آئی سی سی) نے مینز ٹی20 ورلڈکپ کا شیڈول جاری کر دیا۔
میڈیا رپورٹ کے مطابق مینز ٹی20 ورلڈکپ کیلئے تاریخیں سامنے آگئی ہیں، ٹورنامنٹ 4 تا 30 جون تک امریکا اور ویسٹ انڈیزکے 10 مقامات پر کھیلا جائے گا۔
رپورٹس کے مطابق آئی سی سی کی ٹیم نے کچھ مقامات کو شارٹ لسٹ کر لیا ہے، امریکا میں فلوریڈا، ڈیلیس، نیویارک اور موریس ول میں میچزمنعقد ہوں گے۔
واضح رہے کہ امریکا میں موریس ول، ڈیلیس اور نیویارک کوابھی تک انٹرنیشل کرکٹ وینیو کا درجہ حاصل نہیں ہے تاہم موریس ول اور ڈیلیس میجر لیگ کرکٹ کے افتتاحی ایڈیشن کی میزبانی کر رہے ہیں۔
آئی سی سی کی طرف سے کرکٹ ویسٹ انڈیز اور امریکی بورڈ حکام سے ملاقات کے بعد آئندہ مہینوں میں مشاورت سے وینیوز فائنل کیے جائیں گے۔
امریکا اور ویسٹ انڈیز میں ہونے والی ٹی20 ورلڈکپ 2024 میں 20 ٹیمیں شرکت کریں گی،اس بار یہ عالمی مقابلہ پہلے سے مختلف فارمیٹ میں منعقد ہوگا، پہلے راؤنڈ میں ٹیموں کو 5، 5 کے چار گروپوں میں تقسیم کیا جائے گا، ہر گروپ سے 2 ٹاپ ٹیمیں سپر 8 راؤنڈ کیلئے دو گروپس میں تقسیم ہوں گی۔
فارمیٹ کے تحت سپر 8 کے دونوں گروپس کی 2، 2 ٹاپ ٹیمیں سیمی فائنل کیلئے کوالیفائی کریں گی۔
