واشنگٹن / اسلام آباد ( نئی تازہ رپورٹ ) آئی ایم ایف کے ایگزیکٹو بورڈ نے پاکستان کے لیے 3ارب ڈالر کے سٹینڈ بائی قرض معاہدے کی منظوری دے دی ہے۔
انٹرنیشنل مانیٹری فنڈ کے ایگزیکٹو بورڈ کی جانب سے منظوری کے بعد 1 ارب 20 کروڑ ڈالر فوری طور پر جاری کردیے جائیں گے۔
غیر ملکی میڈیا کے مطابق عالمی مالیاتی فنڈ کی طرف سے جاری بیان میں کہا گیا ہے کہ آئی ایم ایف کے ایگزیکٹو بورڈ نے پاکستان کے لیے 3ارب ڈالر کے اسٹینڈ بائی معاہدے کی منظوری دے دی ہے، جو 9 ماہ کے لیے ہوگا ، اس کا مقصد پاکستان کے معاشی استحکام کے پروگرام میں مدد دینا ہے۔
بیان کے مطابق اس معاہدے کا انتظام ایسے موقع پر کیا گیا ہے جب پاکستانی معیشت مشکل حالات سے گزر رہی ہے، مشکل بیرونی ماحول، تباہ کن سیلاب اور غلط پالیسیوں کی وجہ سے اسے بڑے مالی اور بیرونی خسارے، بڑھتی ہوئی مہنگائی اور تیزی سے ختم ہوتے ہوئے زرمبادلیہ کے ذخائر جیسے مسائل کا سامنا ہے۔
یاد رہے کہ گزشتہ ماہ سٹاف لیول پر ہونے والے اس معاہدے کے لیے پہلی قسط کے اجرا سے قبل آئی ایم ایف کے ایگزیکٹو بورڈ کی منظوری درکار تھی. اب پاکستان کو 1.2ارب ڈالر کی پہلی قسط فور طور پرجاری کردی جائے گی جبکہ بقیہ دو اقساط سہ ماہی بنیادوں پرہونے والے جائزوں کے بعد جاری کی جائیں گی۔
