لاہور ( نئی تازہ رپورٹ) لاہور ہائیکورٹ کے رجسٹرار آفس نے نواز شریف کی بطورپارٹی صدر بحالی کی درخواست پر اعتراض عائد کر دیا۔
رجسٹرارآفس کی طرف سے کہا گیا ہے کہ سابق وزیراعظم نواز شریف کو سپریم کورٹ نے نااہل کیا لاہور ہائیکورٹ اس کی سماعت نہیں کر سکتی۔
لاہور ہائیکورٹ میں سابق وزیراعظم نواز شریف کی بطور صدرمسلم لیگ ن بحالی کے لئے درخواست دائرکی گئی تھی۔
آفاق احمد ایڈووکیٹ کے توسط سے دائر درخواست میں چیئرمین پی ٹی آئی عمران خان، سربراہ عوامی مسلم لیگ شیخ رشید، الیکشن کمیشن، وفاقی حکومت اور وزیراعظم پاکستان کو فریق بنایا گیا۔
درخواست میں موقف اپنایا گیا کہ 2017 میں نواز شریف کو قومی اسمبلی سے نااہل قرار دیا گیا، عمران خان اور شیخ رشید نے نواز شریف کو پارٹی کی سربراہی سے ہٹانے کی درخواست دائر کی تھی۔
درخواست گزار نے موقف اختیار کیا کہ 2018 میں سپریم کورٹ نے نواز شریف کو پارٹی صدارت سے ہٹانے کا حکم دیا، جبکہ الیکشن کمیشن نے این اے 95 میانوالی سے عمران خان کو نااہل قرار دے دیا ہے مگر چیئرمین پی ٹی آئی کو پارٹی سربراہی سے نہیں ہٹایا گیا۔
درخواست میں استدعا کی گئی ہے کہ عدالت نواز شریف کو پارٹی صدارت پر بحال کرنے کا حکم جاری کرے۔
لاہور ہائی کورٹ کے رجسٹرار آفس نے درخواست پر اعتراض عائد کرتے ہوئے کہا کہ نواز شریف کو سپریم کورٹ نے نااہل کیا ہائیکورٹ معاملہ کی سماعت نہیں کر سکتی۔
