گوجرانوالہ ( نئی تازہ رپورٹ) گوجرانوالہ کی انسداد دہشتگردیعدالت نے چیف سیکرٹری کو دھمکانے کے کیس میں وزیر داخلہ رانا ثناء اللہ پر فرد جرم عائد کرنے کا فیصلہ کر لیا۔
وفاقی وزیر داخلہ رانا ثناء اللہ کے خلاف انسداد دہشت گردی ایکٹ کے تحت تھانہ انڈسٹریل ایریا گجرات میں درج مقدمے پر پیر کوسماعت ہوئی، رانا ثناء اللہ کے وکیل عبدالماجد عدالت میں پیش ہوئے۔
وزیر داخلہ کے خلاف ادروں کو دھمکانے اور چیف سیکرٹری کو جان سے مارنے کی دھمکیاں دینے کے الزام میں وزیر اعلیٰ پرویز الٰہی کے دور میں مقدمہ درج کیا گیا تھا۔
گجرات پولیس نے مقدمہ خارج کر کے اخراج رپورٹ عدالت میں جمع کرادی تھی، عدالت نے پولیس کی رپورٹ کو مسترد کرتے ہوئے رانا ثناء اللہ کے قابل ضمانت وارنٹ گرفتاری جاری کیے تھے۔
پیر کو وکلا کی جانب سے رانا ثناء اللہ کی حاضری سے استشنی کی درخواست دائر کی گئی، عدالت نے درخواست منظور کرتے ہوئے کیس کی سماعت 28 جون تک ملتوی کر دی اور کہا 28 جون کو وفاقی وزیر داخلہ پر فرد جرم عائد کی جائیگی۔
