راولپنڈی( نئی تازہ رپورٹ) جنوبی وزیرستان میں سیکیورٹی فورسز کے آپریشن میں 8 دہشت گرد مارے گئے جبکہ31 سالہ سیکیورٹی اہلکارشہید ہو گیا۔
پاک فوج کے شعبہ تعلقات عامہ (آئی ایس پی آر) کے بیان کے مطابق سیکیورٹی فورسز نے جنوبی وزیرستان کے علاقہ شنوارسک میں خفیہ اطلاعات پر آپریشن کیا۔
بیان کے مطابق سیکیورٹی فورسزاور دہشت گردوں کے درمیان شدید فائرنگ کا تبادلہ ہوا، سیکیورٹی فورسز نے دہشت گردکمانڈر جان محمد عرف چراغ سمیت 8 دہشت گردوں کو ہلاک کردیا۔
آئی ایس پی آر کے مطابق ہلاک دہشت گردوں سے اسلحہ اور گولہ بارود بھی برآمد ہوا جبکہ مارے گئے دہشت گرد سیکورٹی فورسز کے خلاف کارروائیوں اور معصوم شہریوں کے قتل میں ملوث تھے۔دہشت گردوں سے شدید فائرنگ کے تبادلے میں 31 سالہ سپاہی حامد رسول عمر شہید اور چار اہلکار زخمی ہوگئے۔
