اسلام آباد ( نئی تازہ رپورٹ) دفر خارجہ نے کہا ہے کہ پاکستان نے بھی سعودی عرب اور ایران کے تعلقات کی بحالی کے لیے ہونے والے مذاکرات میں سہولت کار کا کردار ادا کیا ۔
اسلام آباد میں میڈیا بریفنگ کے دوران ترجمان دفتر خارجہ ممتاز زہرہ بلوچ نےکہا کہ پاکستان نے سعودی عرب اور ایران کے درمیان سفارتی تعلقات معمول پر لانے کا خیرمقدم کیا ہے اور اس تاریخی معاہدے کو مربوط کرنے میں چین کی دور اندیش قیادت کو سراہا ہے۔
ترجمان نے کہا ہمیں یقین ہے کہ یہ سفارتی پیش رفت خطے اور اس سے باہر امن و استحکام میں معاون ثابت ہوگی۔
ترجمان دفتر خارجہ نے اس امید کا اطہار کیا کہ سعودی عرب اور ایران کے درمیان سفارتی تعلقات معمول پر آنے سے علاقائی تعاون اور ہم آہنگی کا ماڈل متعین ہوگا۔
ترجمان دفتر خارجہ نے کہا کہ دونوں ممالک کے وزرائے خارجہ کی پہلی ملاقات اسلام آباد میں ہونے والی او آئی سی کانفرنس کے موقع پر ہوئی تھی۔ان کا کہنا تھا کہ ہم اس پیش رفت کا خیرمقدم کرتے ہیں، پاکستان نے دیگر کئی ممالک کی طرح ایران، سعودی عرب مذاکرات میں سہولت کاری کا کردار ادا کیا۔ترجمان نے کہا کہ ہم ایران اور سعودی عرب کے درمیان تعلقات کو معمول پر لانے کے اس تازہ ترین معاہدے سے متعلق کامیاب سفارتی کوششوں پر چین کو مبارکباد دیتے ہیں۔
