لاہور ( نئی تازہ رپورٹ) علی بلال عرف ظل شاہ کی والدہ نے اپنے بیٹے کی حفاظت میں ناکامی کا ذمے دار تحریک انصاف کو قرار دیتے ہوئے کہا ہے کہ عمران خان مجھے میرا بیٹا واپس دے دو ۔
ایک انٹرویو میں ظل شاہ کی والدہ نے کہا کہ ان کے بیٹے کو سازش سے قتل کیا گیا، یہ تحریک انصاف والوں نے کیا ہے۔
انہوں نے بتایا کہ جب سے عمران خان کو گولی لگی، ظلِ شاہ ہر وقت زمان پارک میں بیٹھا رہتا تھا،وہ کہتا تھا کہ عمران خان میرے ووٹ سے وزیراعظم بنے گا۔ظلِ شاہ کی والدہ نے کہا کہ ان کا بیٹا عمران خان کی حفاظت کر رہا تھا مگر ظلِ شاہ کی حفاظت نہیں کی گئی۔
میڈیا رپورٹ کے مطابق علی بلال عرف ظلِ شاہ کے والد نے پولیس کی تحقیقات پراپنے اعتماد کا اظہار کیا ہے۔ ظلِ شاہ کے والد بیٹے کی موت کے خلاف مقدمے کی درخواست میں نگران وزیر اعلیٰ محسن نقوی اور آئی جی کے خلاف اس سے قبل عائد کئے گئے الزامات سے دست بردار ہوگئے ہیں۔
آئی جی پنجاب پولیس ڈاکٹر عثمان انور نے ظلِ شاہ کے گھر جاکرسوگوار خاندان سے تعزیت کا اظہار کیا اور ظل شاہ کے والدین کو ہر ممکن تعاون کا یقین دلاتے ہوئے واضح کیا تھا کہ جب تک متوفی کے والدین مطمئن نہیں ہوں گے، مقدمے کا چالان نہیں جائے گا۔
