اسلام آباد ( نئی تازہ رپورٹ ) وفاقی کابینہ نے نیب قوانین میں ترامیم کے ذریعے چیئرمین قومی احتساب بیورو کو مزید بااختیار بنانے کی منظوری دے دی ہے۔وفاقی کابینہ کی طرف سے نیب قوانین ترامیمی آرڈیننس کے مسودے کی سرکولیشن کے ذریعے منظوری دے دی ہے۔
ترامیم کے مسودے کے مطابق احتساب عدالت سے ناقابل سماعت قرار پانے والے مقدمات چیئرمین نیب دیگر متعلقہ فورم کو بھیج سکیں گے اور ناقابل سماعت قرار دیئے گئے مقدمات بند کرنے کی منظوری دےسکیں گے۔
ذرائع کے مطابق وفاقی کابینہ کے منظور کردہ ترمیمی آرڈیننس کے مسودے میں کہا گیا ہے کہ چیئرمین نیب سے مقدمہ ملنے پر متعلقہ ایجنسی کیس کو التوا کے مرحلے سے کھول سکے گی۔
ذرائع کے مطابق قوانین میں ترمیم سے نیب سے مقدمہ موصول ہونے پر متعلقہ ادارےکو ازسرنو شواہد اکٹھے کرنے کا اختیار ہو گا، نیب ترامیم کے تحت مقدمہ ایک علاقے کی عدالت سے دوسری عدالت منتقل نہیں کیا جا سکے گا۔
ترمیمی مسودے کے تحت چیئرمین نیب کی عدم موجودگی میں ڈپٹی چیئرمین بطور چیئرمین اختیارات کا استعمال کریں گے، ڈپٹی چیئرمین کی عدم موجودگی کی صورت میں وفاقی حکومت کسی بھی نیب افسر کو چیئرمین کے اختیارات سونپ سکے گا، ڈپٹی چیئرمین گریڈ 21 کے سول افسر، لیفٹیننٹ جنرل یا میجر جنرل کے عہدے کے فوجی افسر کو تعینات کیا جا سکے گا۔
