اسلام آباد ( نئی تازہ رپورٹ) وزیر مملکت برائے پٹرولیم ڈاکٹر مصدق ملک نے کہا کہ روس سے تیل کی خریداری کیلئے اپریل میں پہلا آرڈر دیا جائے گا، ٹرانسپورٹیشن اور شپمنٹ پر بات ہو رہی ہے،معاملات جلد طے پا جائیں گے۔
اسلام آباد میں صحافیوں سے گفتگو کرتے ہوئے مصدق ملک نے کہا کہ روس کے ساتھ ٹرانسپورٹیشن اور شپمنٹ کے معاملہ پر بات ہو رہی ہے کیوں کہ ان کے ذخائر کافی دور ہیں، وہاں سے پاکستان تک 20 سے 25 دن لگ جاتے ہیں، مارچ کے آخر تک ہماری طرف سے ڈیڈ لائن تھی، جلد تمام معاملات کو حتمی شکل دے دی جائے گی۔
انہوں نے بتایا کہ اپریل میں روس سے تیل خریدنے کا پہلا آرڈر دیا جائے گا جس کے بعد تسلسل سے سستا تیل ملتا رہے گا ۔ وزیر مملکت نے کہا کہ گھریلو صارفین کیلئے کھانا بنانے کے اوقات میں گیس کی فراہمی کو یقینی بنایا جا رہا ہے جس میں صبح 6 سے 9 تک، دوپہر 12 سے 2 تک اور شام 6 سے رات 9 تک گیس کی لوڈشیڈنگ نہیں کی جائے گی۔
وزیر مملکت مصدق ملک نے کہا کہ ملک کا قانون امیر، غریب سب کیلئے برابر ہونا چاہیئے، نوازشریف کو اپنے بیٹے سے تنخواہ نہ لینے پر ہٹایا گیا جبکہ عمران خان سب کو کہہ رہا ہے کہ میں طاقتور ہوں مجھ پر قوانین لاگو نہیں ہوتے، وہ ریاست مدینہ کے دعوے میں بھی دہرا معیار رکھتے ہیں، دوسروں کے بچوں کو جیل بھرنے کیلئے راغب کرتے ہیں اور خود گرفتاری سے ڈرتے ہیں۔ انہوں نے سوال کیا کہ عمران خان کسے کہہ رہے ہیں کہ بات کرنے کو تیار ہوں
مصدق ملک نے کہا کہ عمران خان نے سکولوں اور ہسپتالوں کیلئے مختص 250 ملین ڈالر ملک ریاض کو دے کر فرد واحد کو نوازا اور اسکے بدلے میں 450 کنال زمین حاصل کی، عمران خان لوگوں کو اداروں کے خلاف استعمال کر رہے ہیں اور ہجوم اکٹھا کر کے اداروں کو مرعوب کرنے کی کوشش کی جا رہی ہے۔
