اسلام آباد ( نئی تازہ رپورٹ) وزیراعظم شہباز شریف قطر کے امیر کی دعوت پر دوحہ میں اقوام متحدہ کے تحت کم ترقی یافتہ ممالک کی کانفرنس میں شرکت کے لیے اتوار 5 مارچ کو قطر روانہ ہوں گے۔ وزیراعظم کانفرنس کے موقع پر شریک رہنماؤں اور وفود سے ملاقاتیں بھی کریں گے
ترجمان دفتر خارجہ کے مطابق امیر قطر کی دعوت پر وزیراعظم شہباز شریف 5 سے 6 مارچ کو دوحہ جائیں گے جہاں وہ اقوام متحدہ کے زیراہتمام کم ترقی یافتہ ممالک کی پانچویں کانفرنس میں شرکت کریں گے۔
5 سے 9 مارچ تک منعقد ہونے والی اس کانفرنس کے دوران کم ترقی یافتہ ممالک میں پائیدار ترقی کو تیز کرنے کےاقدامات پر زیر غور لائے جائیں گے جن سے انہیں خوشحالی کی راہ پر گامزن کرنے میں مدد ملے گی۔دفترخارجہ کے بیان میں کہا گیا ہے کہ کانفرنس سے ان ممالک کو خوشحالی کی راہ پر آگے بڑھنے میں مدد ملے گی ، کم ترقی یافتہ ممالک کے حق میں اضافی عالمی امدادی اقدامات کو متحرک کیا جائے گا۔
کانفرنس میں شریک ہونے والے رہنما ترقیاتی شراکت داروں کے درمیان نئی شراکت داری پر اتفاق کریں گے۔
ترجمان دفتر خارجہ کے مطابق وزیراعظم کانفرنس کے موقع پر شریک رہنماؤں اور وفود سے ملاقاتیں بھی کریں گے، پاکستان 2030 کے ترقیاتی ایجنڈے اور اہداف کے حصول کیلئےعالمی شراکت کی حمایت کرتا ہے۔وزیراعظم کی شرکت کم ترقی یافتہ ممالک سے یکجہتی اورحمایت کی نشاندہی کرے گی۔
