اسلام آباد ( نئی تازہ رپورٹ) پی آئی اے نے حج 2023 کیلئے فلائٹ آپریشن اورپرائیوٹ حج کے لیے کرایوں کا اعلان کردیا۔
قومی ائیرلائن کےترجمان مطابق پرائیوٹ حج کے لیے جانے والے عازمین کے لیے کرایہ 870 ڈالر سے لے کر ایک ہزار 180 ڈالرز تک مقرر کیا گیا ہے۔ یہ کرایہ ساوتھ ریجن کے عازمین کے لیے ہوگا جس میں کراچی،کوئٹہ،سکھر اور حیدرآباد شامل ہیں۔
نارتھ ریجن کے عازمین کے لیے کرایہ 910 ڈالر سے لے کر ایک ہزار 220 ڈالر تک مقرر کیا گیا ہے اس ریجن میں لاہور،اسلام آباد،پشاور ، ملتان اور دیگر شہر شامل ہیں۔سرکاری حج سکیم کے تحت جانیوالے عازمین کے لیے کرایوں کا اعلان وزارت مذہبی امور کی طرف سے کیا جائے گا۔
پی آئی اے کا حج فلائٹ آپریشن 21مئی سے شروع ہو کر 2اگست تک جاری ر ہے گا جس کے دوران 38 ہزار سے زائد عازمین کے سفر کی توقع ہے۔ اس کے علاوہ 44ہزار سے زائد عازمین سعودی ایئرلائن اور باقی پاکستان سے آپریٹ ہونیوالی دو نجی ایئرلائنز کے ذریعے سعودی عرب جائیں گے۔
پی آئی اے کی طرف سے جدہ اور مدینہ کے حج فلائٹ آپریشن کیلئے بوئنگ777اور ایئربس320 کااستعمال کیا جائے گا۔
