اسلام آباد ( نئی تازہ رپورٹ) پاکستان اورآئی ایم ایف کے درمیان اسٹاف لیول معاہدہ بجلی بلوں کی رکی ہوئی وصولیاں شروع ہونے تک تاخیر کا شکار ہو گیا ہے۔ذرائع وزارت خزانہ کے مطابق آئی ایم ایف کے ساتھ اسٹاف لیول معاہدہ 9 فروری کو ہونا تھا تاہم پاکستان کے دورے پر موجود عالمی مالیاتی ادارے کی ٹیم واپس چلی گئی تھی اور بعد میں ورچوئل مذاکرات ہو رہے تھے، معلوم ہوا ہے کہ گزشتہ روز پاکستان اور آئی ایم ایف کے درمیان مذاکرات نہیں ہوئے۔
ذرائع کے مطابق مذاکرات 2 مارچ کو دوبارہ شروع ہونے کا امکان ہے، مذاکرات بجلی بلوں کی رکی ہوئی وصولیاں شروع کرنے کے بعد ہوں گے۔وزارت خزانہ کے ذرائع کا کہنا ہے کہ حکومت کو سیلز ٹیکس میں اضافے کا نوٹیفکیشن بھی جاری کرنا ہو گا، مانیٹری پالیسی میں اضافے کا بھی اعلان کرنا ہو گا اور قرضہ پروگرام کی بحالی کے لیے آئی ایم ایف کی کئی شرائط پر عمل درآمد کرنا ہو گا۔
