اسلام آباد ( نئی تازہ رپورٹ )آفتاب سلطان کے استعفے کے بعدڈپٹی چیئرمین ظاہر شاہ کوقام مقام چیئرمین نیب مقرر کر دیا گیا۔
نیب کی جانب سے جاری نوٹی فیکیشن کے مطابق ظاہر شاہ کا تقرر 22 فروری 2023 سے کیا گیا ہے۔ڈپٹی چیئرمین نیب ظاہر شاہ کوقومی احتساب ترمیمی ایکٹ 1999 کے سیکشن 6 بی کے تحت چیئرمین تعینات کیا گیا ہے۔ وہ نئے چیئرمین نیب کے تقرر تک اپنی ذمہ داریاں انجام دیتے رہیں گے۔
ظاہر شاہ اس سے پہلے نیب میں ایڈیشنل ڈائریکٹر کے عہدے پرخدمات انجام دے چکے ہیں۔آفتاب سلطان کے مستعفی ہونے کے بعد سے ظاہر شاہ ہی ادارے کے معاملات سنبھالے ہوئے ہیں، وہ 10 برس سے زائد عرصے سے نیب سے وابستہ ہیں۔ ظاہر شاہ ڈی جی نیب راول پنڈی بھی رہے ہیں جبکہ 2021 سے وہ ڈپٹی چیئرمین کے عہدے پر فائز تھے۔
یاد رہے کہ چیئرمین نیب آفتاب سلطان منگل کے روز اپنے عہدے سے مستعفی ہو گئے تھے۔وزیرِاعظم ہاؤس سے جاری بیان میں بتایا گیا تھا کہ وزیراعظم شہباز شریف نے چیئرمین نیب آفتاب سلطان کا استعفی منظور کر لیا ہے۔ وزیراعظم آفس کے مطابق چیئرمین نیب آفتاب سلطان نے ذاتی وجوہات کی بنا پر استعفٰی دیا تھا۔
