کوہاٹ ( نئی تازہ رپورٹ) لکی مروت سے پشاور جانے والی مسافر کوچ اور ٹرالر میں تصادم سے دو بچوں اور خواتین سمیت 17 افراد جاں بحق ہوگئے۔ٹرالرنے بریک فیل ہو جانے کے باعث مخالف سمت سے آنے والی مسافر کوچ کو کچل دیا۔اطلاعات کے مطابق حادثہ کوہاٹ میں انڈس ہائی وے پرٹنل کے قریب پیش آیا، جہاں ایک تیز رفتار ٹرالر سامنے سے آنے والی مسافر کوچ پر چڑھ گیا، حادثے میں 12 مسافر موقع پر دم توڑ گئے،جبکہ 6 زخمیوں کو ہسپتال منتقل کیا گیا تا ہم ان میں سے پانچ افراد زخموں کی تاب نہ لا کر چل بسے جس سے جاں بحق ہونے والوں کی تعداد 17 ہوگئی۔
حادثے کے بعد انتظامیہ ، پولیس اور ریسکیو ٹیموں نے موقع پر پہنچ کر امدادی کارروائیاں شروع کردیں، جاں بحق افراد میں خواتین اور بچے بھی شامل بتائے گئے ہیں، ریسکیو ٹیموں نے جاں بحق افراد کی لاشوں اور زخمیوں کو ڈی ایچ کیو ہسپتال منتقل کردیا ۔
حادثے کے نتیجے میں دونوں گاڑیاں تباہ ہوگئیں،ریسکیو حکام کی جانب سے بتایا گیا ہے کہ حادثہ ٹرالر کے بریک فیل ہو جانے کی وجہ سے بے قابو ہوجانے کے باعث پیش آیا، جو لکی مروت سے پشاور جانیوالی مسافر کوچ سے ٹکرا گیا ۔
