اسلام آباد ( نئی تازہ رپورٹ)عدالت نے توشہ خانہ ریفرنس فوجداری کیس میں عمران خان کو ایک بار پھر حاضری سے استثنا دیے ہوئے فرد جرم کی کارروائی 28 فروری تک مؤخر کردی ۔
منگل کو ایڈیشنل سیشن جج ظفر اقبال کی عدالت میں الیکشن کمیشن کےتوشہ خانہ ریفرنس میں عمران خان کے خلاف فوجداری کارروائی کے کیس کی سماعت ہوئی، عمران خان کے وکیل بیرسٹر گوہر نےعدالت میں پیش ہو کر حاضری سے استثنا کی درخواست دائر کردی۔
عدالت نے حیرت کا اظہار کرتے ہوئے دریافت کیا کہ آج پھر استثنا کی درخواست ہے ؟اب ان کو کہیں کہ پیش ہو جائیں۔ وکیل نے جواب دیا 28 فروری کو عمران خان کا ایکسرے ہو جائے گا۔ ایڈیشنل سیشن جج نے ریمارکس دیے کہ اس طرح ہوتا رہا تو یہ ٹرائل ہوتا نظر نہیں آرہا ۔ وکیل نے بتایا کہ کل بھی عمران خان بڑی مشکل سے لاہور ہائی کورٹ پہنچے تھے ، جس پر جج نے کہا کہ اسی مشکل سے ان کو یہاں بھی آنا تو پڑے گا ۔
ایڈیشنل سیشن جج نے کہا کہ پمز سے ان کی تصدیق کروا لیتے ہیں۔ کوئی مجھے ایم ایل سی تو دکھائیں انجریز کی نوعیت کیا ہے ؟۔ کون سی انجری عمران خان کو آئی ہے وہ تو دکھا دیں۔ دوران سماعت الیکشن کمیشن کے وکیل نے میڈیکل بورڈ بنانے کی استدعا کرتے ہوئے کہا کہ کل بھی عمران خان وہیل چیئر پر نہیں بلکہ خود چل کر لاہور ہائیکورٹ پیش ہوئے۔
عدالت نے ریمارکس دیے کہ ہم نے 9 جنوری کو طلب کرنے کا حکم دیا تھا آج 21 فروری ہو چکی ہے۔ کیس کی کاپیز ملزم کوہی دی جاتی ہیں، پلیڈر کو نہیں ۔ آج ہم نے اسی لیے عمران خان کی ذاتی حاضری رکھی تھی۔ عدالت نے اس موقع پر کاپیز الیکشن کمیشن کے وکیل کو واپس کردیں۔ عدالت کا کہنا تھا کہ یقین کریں ہم ہر تاریخ پر استثنا دے رہے ہیں، پتا تو چل جائے کب آئیں گے ؟۔
عمران خان کے وکیل نے استدعا کی کہ عدالت آج کا استثنا منظور کر لے، آئندہ تاریخ پر آجائیں گے۔ یہ کچھ کیس ہی نہیں ہے، عمران خان ضرور پیش ہوں گے۔ ڈاکٹر کی تجویز اور سکیورٹی کی وجہ سے عمران خان پیش نہیں ہو رہے۔ بینکنگ کورٹ اور باقی عدالتوں میں بھی پیش ہونا ہے، یہاں بھی آجائیں گے۔
الیکشن کمیشن کے وکیل نے کہا کہ اگر کیس کی نقول یہ اب لے لیں تو میں استثنا کی مخالفت نہیں کروں گا ، جس پر عمران خان کے وکیل نے جواب دیا کہ ہم نے اس کیس کے دائرہ اختیار سے متعلق درخواست دینی ہے۔ وکیلِ الیکشن کمیشن نے کہا کہ عدالت آئندہ سماعت کی تاریخ فرد جرم کے لیے مقرر کردے۔
ایڈیشنل سیشن جج نے کہا 28 فروری کی تاریخ رکھ رہا ہوں اس سے آگے التوا نہیں ہو گا ۔ عدالت نے عمران خان کو اگلی سماعت پر حاضری یقینی بنانے کا حکم دیتے ہوئے استثنا کی درخواست منظور کرلی اورفرد جرم عائد کرنے کی کارروائی 28 فروری تک مؤخر کردی۔
