بنوں ( نئی تازہ رپورٹ) شمالی وزیرستان میں کاؤنٹر ٹیررازم ڈیپارٹمنٹ کی ٹیم پر دہشت گردوں کے حملے میں زیر حراست تین ملزمان ہلاک ہوگئے، سی ٹی ڈی کی جوابی فائرنگ سےکالعدم تنظیم کے 4 دہشت گرد بھی مارےگئے۔
محکمۂ انسدادِ دہشت گردی (سی ٹی ڈی) خیبر پختونخوا کے مطابق پیر اور منگل کی درمیانی شب میر علی بائی پاس پر دہشت گردوں نے سی ٹی ڈی کی ٹیم پر اس وقت حملہ کردیا جب شمالی وزیرستان کے علاقے میران شاہ سے 3 دہشت گردوں کو بنوں منتقل کیا جارہا تھا۔فائرنگ کے تبادلے میں زیرحراست تینوں ملزمان مارے گئے جبکہ چار حملہ آور بھی ہلاک ہو گئے۔
سی ٹی ڈی کے مطابق کچھ حملہ آور رات کی تاریکی کا فائدہ اٹھا کر فرار ہو ہوگئے، جن کی تلاش شروع کر دی گئی ہے۔ سکیورٹی فورسز اور پولیس کی بھاری نفری نے علاقے میں سرچ آپریشن شروع کردیا ہے۔ہلاک دہشت گرد سکیورٹی فورسز اور پولیس پر دستی بم حملوں اور ٹارگٹ کلنگ میں ملوث تھے، دہشت گردوں سے 4 شارٹ مشین گنز،کارتوس اور دیگر سامان برآمد کرلیا گیا۔
ترجمان سی ٹی ڈی کے مطابق دہشت گرد اپنے ساتھیوں کو چھڑانا چاہتے تھے، ہلاک دہشت گرد تھانہ کینٹ پر دستی بم حملے اورکانسٹیبل افتخار کی ٹارگٹ کلنگ میں بھی ملوث تھے، سکیورٹی فورسز اور پولیس کی بھاری نفری نے علاقے میں سرچ آپریشن شروع کردیا ہے۔ مارے گئے دہشت گردوں کا تعلق کالعدم ٹی ٹی پی سے بتایا گیا ہے۔ایک الگ واقعہ میں گزشتہ روز خیبرپختونخوا کے ضلع ڈ یرہ اسماعیل خان میں کھتی چیک پوسٹ پر دہشتگردوں کے حملے میں ایک اہلکار زخمی ہوگیا۔
