اسلام آباد( نئی تازہ رپورٹ )خیبرپختونخوا کے ہیلی کاپٹرز میں 1800 غیرقانونی سفر، عمران خان اور دیگر افراد کے ذمہ 19 کروڑ 83 لاکھ روپے کے واجبات کاا نکشاف ہوا ہے، الیکشن کمیشن آف پاکستان نے خیبرپختونخواحکومت کے ہیلی کاپٹرز کے استعمال پرعمران خان اور دیگر غیرمجاز افراد کے ذمہ 19 کروڑ 83 لاکھ روپے سے زیادہ کے بقایا جات کے معاملہ پر قومی احتساب بیورو( نیب ) کومراسلہ بھجوا دیا ۔
ای سی پی کے مراسلہ میں لکھا گیا ہے کہ نادہندہ افراد کی فہرست الیکشن کمیشن کو مہیا کی جائے، قانون کے مطابق مزید کارروائی کیلئے نادہندگان کی فہرست ریٹرننگ افسران کو بھجوائی جائے گی۔ نجی ٹی وی نے نیب دستاویز کے حوالے سے کہا ہے کہ خیبرپختونخوا کے دو سرکاری ہیلی کاپٹرز میں 1800 غیرقانونی سفر کیے گئے، سیاست دانوں کی طرف سے 588 مرتبہ ،سرکاری اہلکاروں کی طرف سے 577 اوردیگر گیر مجاز افراد نے 635 مرتبہ صوبے کے سرکاری ہیلی کاپٹرز کے ذریعے سفر کیا۔دستاویز میں انکشاف کیا گیا کہ ہیلی کاپٹرز استعمال کرنے والے غیر مجاز افراد کیخلاف 19 کروڑ 83 لاکھ روپے سے زیادہ کے بقایا جات ہیں، جس میں سے 9 کروڑ، 68 لاکھ روپے سے زائد سیاست دانوں کے ذمہ واجب الادا ہیں۔
دستاویز سے ظاہر ہوتا ہے کہ سرکاری اہلکاروں کے ذمہ 5 کروڑ،8 لاکھ روپے سے زائد جبکہ دیگر افراد کے ذمہ 5 کروڑ روپے سے زیادہ رقم واجب الادا ہے۔ یاد رہے کہ خیبرپختونخوا اسمبلی نے یکم نومبر 2008 سے ہیلی کاپٹرز کے استعمال کو قانونی قرار دینے کا قانون منظور کیا تھا، ہیلی کاپٹرز کے استعمال سے متعلق قانون میں ترمیم کو مسلم لیگ ن نے پشاور ہائیکورٹ میں چیلنج کر رکھا ہے۔
