کراچی (نئی تازہ رپورٹ) بندرگاہ پرکئی ماہ سے پھنسے دو ہزار سے زائد کنٹینرز ریلیز ہونےسے ملک میں دالوں کی ہول سیل قیمت میں 25 روپے فی کلو تک کمی ہوگئی ہے۔اطلاعات کے مطابق کراچی کی دونوں بندرگاہوں میں پھنسے ہزاروں کنٹینرز ریلیز ہونا شروع ہوگئے ہیں، کنٹینرز کی ریلیز میں حکومتی احکامات کے مطابق اشیائے خور و نوش اور عام ضروریات کی چیزوں کو ترجیح دی جارہی ہے۔
پورٹ ذرائع کے مطابق چند روز کے دوران بندرگاہوں پر موجود مختلف اجناس کے 2400 کنٹینرز ریلیز کئے گئے ہیں۔ جس کا اثر ملک بھر کی ہول سیل مارکیٹوں پر پڑنا شروع ہو گیا ہے۔ نجی ٹی وی کے مطابق ہول سیل گروسرز ایسوسی ایشن کے چیئرمین تاجر رہنما عبدالرؤف ابراہیم نے بتایا کہ کنٹینرز پھنسنے کی وجہ سے ناجائز منافع خوری شروع ہوگئی تھی تاہم اب کنٹینرز ریلیز ہونے سے مارکیٹ میں سٹے باز بیوپاریوں کو بھاری مالی نقصان ہو رہا ہے۔
حالیہ دنوں میں ہول سیل مارکیٹ میں دالوں اور دیگر اجناس کی قلت ختم اور سپلائی میں اضافہ دیکھا گیا ہے، جس کی وجہ سے مختلف دالوں کی قیمتوں میں 20 سے 25روپے فی کلو گرام تک کم ہو ئی ہے۔ مارکیٹ ذرائع کے مطابق قیمتوں میں کمی کا اثر آئندہ چند روز میں پرچون کی سطح تک منتقل ہوجائے گا ۔عبدالرؤف ابراہیم کے مطابق کنٹینرز ریلیز ہونے کے بعد آئندہ کچھ روز میں دالوں اور اجناس کی قیمتیں مزید کم ہو نے کی توقع ہے۔
