راولپنڈی ( نئی تازہ رپورٹ ) کاؤنٹر ٹیررازم ڈپارٹمنٹ نے راولپنڈی اور اسلام آباد میں دہشتگردی کا بڑا منصوبہ ناکام بنا تے ہوئے 2 انتہائی مطلوب دہشتگردوں کو گرفتار کر لیا ۔
سی ٹی ڈی پنجاب کے مطابق حساس ادارے کے ساتھ مل کر راولپنڈی میں مشترکہ کارروائی کی گئی جس کے دوران کالعدم تحریک طالبان پاکستان (ٹی ٹی پی) سے تعلق رکھنے والے 2 انتہائی مطلوب دہشتگردوں کو گرفتار کیا گیا۔سی ٹی ڈی پنجاب کے مطابق گرفتا دہشتگردوں کا تعلق ٹی ٹی پی کے حاجی فقیر گروپ سے ہے، گرفتار ملزمان جڑواں شہروں راولپنڈی اور اسلام آباد میں میں دہشتگردی کا بڑا منصوبہ بنا رہے تھے، ذرائع کے مطابق دہشت گردوں نے خود کش حملہ آوروں کیساتھ راولپنڈی پولیس لائنز پر حملے کا منصوبہ بنا رکھا تھا۔
گرفتار ملزمان نے دوران تفتیش انکشاف کیا ہے کہ راولپنڈی کا تھانہ صدر بیرونی ، ڈسٹرکٹ کورٹس راول پنڈی اور سینٹ پال چرچ ٹارگٹ تھے۔ انہوں نے مقامی سہولت کاروں کی مدد سے تمام مقامات کی ریکی کی اور تصاویر کالعدم تحریک طالبان پاکستان ( ٹی ٹی پی) کے جنگجو کو افغانستان بھجوائیں۔ گرفتار ہونے والے دہشت گردوں سے حساس دستاویزات، گولہ بارود، جدید اسلحہ اور سیٹلائیٹ فون بھی برآمد کیے گئے ہیں۔ دوران تفتیش دہشت گردوں نے انکشاف کیا کہ وہ کانونٹ اسکول راولپنڈی سمیت کئی دیگر حساس مقامات پر بھی تخریبی کارروائیاں ک کرنے والے تھے۔ ذرائع نے بتایا کہ دہشت گردوں کو حاجی فقیر گروپ افغانستان سے آپریٹ کر رہا تھا۔ملزمان کے خلاف مقدمہ درج کر کے مزید تفتیش شروع کر دی گئی ہے۔
