ایلون مسک کا صارفین کو بھی ٹوئٹر کی آمدن سے حصہ دینے کا اعلان

سان فرانسسکو(نئی تازہ رپورٹ) ٹوئٹر کے چیف ایگزیکٹوایلون مسک نے صارفین کو بھی ٹوئٹر کی آمدن سے حصہ دینے کا اعلان کر دیا، ٹوئٹر صارفین اب اپنے اکاؤنٹ پر اشتہارات سے پیسے کماسکیں گے۔

ایلون مسک نے اپنےایک ٹویٹ میں بتایا ہے کہ ٹوئٹر صارفین کو بھی اب اشتہارات کی آمدن سے حصہ ملے گا۔ ٹوئٹر کے چیف ایگزیکٹو کے مطابق یہ پالیسی صرف ویریفائیڈ اکاؤنٹس رکھنے والے ٹوئٹر صارفین کے لئے ہو گی ۔ اور ایسے صارفین کو ٹویٹ کے ریپلائی تھریڈ میں چلنے والے اشتہارات سے آمدن ہو گی. تاہم یہ واضح نہیں کیا گیا کہ صارفین کو اشتہارات کی آمدن سے کتنا حصہ ملے گا ۔یہ پالیسی فوری طور پر نافذ کر دی گئی ہے. ایلون مسک نے ٹوئٹر خریدنے کے بعد اکاؤنٹس کو ویریفائی کرنے کیلئے 8 ڈالر ماہانہ فیس لاگو کرنے کا اعلان کیا تھا۔