اسلام آباد ( نئی تازہ رپورٹ) آئی ایم ایف کے مشن چیف نے امید ظاہر کی ہے کہ حکومت عالمی مالیاتی فنڈ کے تقاضوں کے مطابق 9ویں جائزہ کو مکمل کرےگی.جبکہ وفاقی وزیرخزانہ سینیٹر اسحاق ڈارنے کہا ہے 9ویں جائزہ کی تکمیل کے لئے آئی ایم ایف کے مشن کے ساتھ مکمل تعاون کریں گے ، پاکستان آئی ایم ایف پروگرام مکمل کرنے کے لئے پر عزم ہے، وزیر خزانہ سے منگل کو آئی ایم ایف کے وفد کی ملاقات ہوئی ، آئی ایم ایف وفد کی قیادت مشن چیف نتھن پورٹر نے کی۔
اس موقع پر آئی ایم ایف کی ریذیڈنٹ نمائندہ ایسترفیرس روئیس ،وزیرمملکت برائےخزانہ ومحصولات عائشہ غوث بخش،معاون خصوصی طارق باجوہ ، معاون خصوصی محصولات طارق محمود پاشا، گورنر سٹیٹ بینک جمیل احمد، سیکرٹری خزانہ ،چیئرمین ایف بی آر، آئی ایم ایف وفد کےارکان اوروزارت خزانہ کے سینئرافسران بھی موجود تھے۔ اجلاس میں آئی ایم ایف کے توسیع فنڈ سہولت (ای ایف سی) کے تحت 9 ویں جائزے کے لئے پاکستان کی معیشت اور مالیاتی واصلاحاتی ایجنڈاکاجائزہ لیاگیا۔
وزیر خزانہ نے مالیاتی خلیج کم کرنے ، ایکسچینج ریٹ کے استحکام اورمعیشت کی بہتری کے لئےتوانائی کے شعبے سمیت قومی معیشت کے مختلف شعبوں میں اصلاحات کے لئے حکومت کے اقدامات سے وفد کوآگاہ کیا۔ اسحاق ڈار نے کہاکہ حکومت نے بجلی کے شعبے میں بھی اصلاحات کاسلسلہ شروع کیاہے اور بجلی وگیس کے شعبے میں گردشی قرضے کےخاتمہ کے لئے ایک کمیٹی قائم کی گئی ہے جو ا س حوالے سے طریقہ کار وضع کرے گی۔
وزیر خزانہ نے مذاکرات کے تسلسل پرآئی ایم ایف کی مینجنگ ڈائریکٹر کاشکریہ اداکیا اور کہا کہ ماضی میں بطوروزیر خزانہ انہوں نے آئی ایم ایف کے ساتھ ایک پروگرام مکمل کیاتھا اور موجودہ حکومت آئی ایم ایف کےساتھ جاری پروگرام کو مکمل کرنے میں پرعزم ہے۔ انہوں نے 9ویں جائزے کی تکمیل میں آئی ایم ایف کو حکومت کی مکمل حمایت اور تعاون کا یقین دلایا۔ آئی ایم ایف کے مشن چیف نے اس امید کااظہار کیاکہ حکومت عالمی مالیاتی فنڈ کے تقاضوں کے مطابق 9ویں جائزہ کو مکمل کرےگی۔انہوں نے اس امید کابھی اظہار کیاکہ پاکستان مختلف شعبوں میں اصلاحات کا سلسلہ جاری رکھے گااور آئی ایم ایف کے پروگرام کوبروقت مکمل کرے گا۔ نیتھن پورٹر نے کہاکہ مالیاتی اصلاحات پر آئی ایم ایف پاکستان کے ساتھ مل کر کام کرے گا۔
