پشاور ( نئی تازہ رپورٹ) وزیراعظم شہباز شریف اور آرمی چیف جنرل عاصم منیرپولیس لائنز مسجد میں دھماکے کے چند گھنٹے بعد پشاور پہنچ گئے، تفصیلات کے مطابق وزیراعظم شہباز شریف اورپاک فوج کے سربراہ جنرل عاصم منیر پیر کی شام پشاور پہنچے جہاں انہوں نے لیڈی ریڈنگ ہسپتال کا دورہ کیا اور پشاور پولیس لائنز مسجد دھماکے میں زخمی ہونے والوں کی عیادت کی۔وزیراعظم نے پولیس لائنز پشاور کی مسجد میں خودکش دھماکے پر آئی جی خیبر پختونخوا پر سخت برہمی کا اظہار کیا۔اور آئی جی خیبر پختونخوا معظم جاہ انصاری سے پوچھا کہ خود کش حملہ آور پولیس لائنز میں کیسے داخل ہوگیا ؟ پولیس لائنز میں داخلےکا ایک ہی گیٹ ہے، حملہ آور کہاں سے آیا؟ جس پرآئی جی معظم جاہ انصاری نے بتایا کہ پولیس لائنز میں فیملی کوارٹرز بھی ہیں،کیا پتہ حملہ آورکہاں سے آیا اورکیسے داخل ہوگیا؟ ہوسکتا ہےکہ حملہ آور پہلے سے ہی اندر رہ رہا ہو ، تحقیقات کر رہے ہیں کہ واقعہ کیسے پیش آیا اور حملہ آور کیسے داخل ہوا؟
قبل ازیں وفاقی وزیر اطلاعات مریم اورنگ زیب نے سماجی رابطے کی ویب سائٹ ٹوئٹر پر بتایا تھا کہ وزیراعظم شہباز شریف نے واقعے پر ہنگامی اجلاس طلب کرتے ہوئےاور تمام متعلقہ اداروں کے حکام کو بلایا ہے۔
