لاہور ( نئی تازہ رپورٹ) پاکستان کی مقبول اداکارہ سجل علی جلد شہرہ آفاق ناول ’امراؤ جان ادا‘ پر مبنی ویب سیریز میں مرکزی کردار میں نظر آئیں گی۔معروف شوبز ویب سائٹ کی رپورٹ میًں بتایا گیا ہے کہ سجل علی متحدہ عرب امارات کی کمپنی کی جانب سے تیار کی جانے والی ویب سیریز میں کردار ادا کریں گی۔ ’امراؤ جان ادا‘ پر بنائی جانے والی ویب سیریز کو حامد حسین اور محمد یقوب پروڈیوس کریں گے۔رپورٹ کے مطابق ویب سیریز کو ناول کے عین مطابق تیار کیا جائے گا اور اس میں ناول کے مکالمے بھی شامل کیے جائیں گے۔ سیریز میں مرکزی کردار سجل علی نبھائیں گی، جبکہ ایک دوسری اداکارہ کو بھی لیڈ کردار کے لیے کاسٹ کیا جائے گا
سیریز میں پاکستان کے دیگر معروف اداکاروں اور بھارتی اداکاروں کو بھی کاسٹ کیے جانے کا امکان ہے۔ اس سے قبل پاکستان اور بھارت میں ’امراؤ جان ادا‘ ناول پر متعدد ڈرامے اور فلمیں بنائی جا چکی ہیں۔’امراؤ جان ادا‘ پر پاکستان میں 1972 میں اسی نام سے بننے والی فلم نےکافی شہرت حاصل کی تھی، جبکہ1981 میں اسی ناول کے نام پر بھارت میں فلم بنی، جس میں مرکزی کردار اداکارہ ریکھاکا تھا۔
