پاکستانی اسکواش پلیئر اشعب عرفان نے امریکہ میں ہونے والا جانز گریک اوپن اسکواش ٹورنامنٹ جیت لیا۔ اس بارہ ہزار ڈالر انعامی رقم والے پی ایس اے چیلنجر ایونٹ کے فائنل میں انہوں نے ملیشیا کے نیتھن چوآ کو شکست دی۔
میچ میں اشعب نے پہلا گیم 8-11 سے ہارنے کے بعد شاندار کم بیک کیا اور اگلے تین گیمز 11-2، 11-2 اور 11-6 سے جیت لیے۔ اس طرح انہوں نے فائنل 1-3 کے اسکور سے اپنے نام کیا۔
فائنل میں رسائی کے لیے اشعب نے سیمی فائنل میں برازیل کے ڈایوگو گووبی کو 3-1 سے شکست دی تھی، جس میں اسکور 11-7، 14-12، 4-11 اور 11-5 رہا۔
یہ کامیابی رواں سال اشعب عرفان کا تیسرا پی ایس اے ٹائٹل ہے۔ اس سے پہلے وہ آسٹریلیا اور امریکہ میں بھی ایونٹس جیت چکے ہیں۔ ان کی حالیہ کارکردگی نے انہیں پی ایس اے ورلڈ رینکنگ میں ٹاپ 60 کے قریب پہنچا دیا ہے اور اپریل 2025 میں انہوں نے کیریئر ہائی رینکنگ ورلڈ نمبر 57 حاصل کی۔
گزشتہ سال اسی ٹورنامنٹ کے فائنل میں پاکستان کے عاصم خان نے اشعب عرفان کو شکست دے کر ٹائٹل جیتا تھا۔ اس بار اشعب نے شاندار واپسی کرتے ہوئے ٹورنامنٹ جیت کر پاکستان کے لیے ایک اور اعزاز اپنے نام کیا ہے۔
