نوجوان پاکستانی اسکواش پلیئر اصحاب عرفان نے امریکہ میں ہونے والا روچیسٹر پروآم ٹورنامنٹ جیت لیا۔ فائنل میں گومز ڈومنگیوز کے خلاف 3-1 سے کامیابی کے ساتھ ٹاپ پوزیشن اپنے نام کی۔
عرفان کو پہلے راؤنڈ میں بائی کے ساتھ اگلے رائونڈ میں پہنچے، جس سے انہیں آنے والے مشکل میچوں کے لیے توانائی بچانے کا موقع ملا۔ دوسرے راؤنڈ میں لاکروئس کے خلاف 3-0 کی زبردست کامیابی حاصل کی، ان کا سکور (11-5، 11-8، 14-12) رہا۔ اصحاب عرفان نے کوارٹر فائنل میں اپنی کامیابی کا سلسلہ جاری رکھتے ہوئے اے اوناوپیمپو کو بھی تین صفر سے (11-9، 11-8، 11-9) سے شکست دی۔
سیمی فائنلزمیں آر پالامینو کے خلاف ایک سخت مقابلے کے بعد کامیابی پاکستانی نوجوان سٹار کے نام رہی۔ عرفان نے شاندارکھیل کا مظاہرہ کرتے ہوئے 3-2 سے کامیابی حاصل کی۔ ان کا سکور(9-11، 11-9، 11-2، 4-11، 11-4)رہا۔
فائنل میں ڈومنگوئز کے خلاف بھی اصحاب عرفان کی کارکردگی شانداررہی۔ چار سیٹ تک جانے والے اس سنسنی خیز مقابلے میں عرفان نے اپنے حریف کو 12-10، 11-4، 9-11 اور 11-9 کے اسکور کے ساتھ 3-1 سے شکست دی۔
