سیالکوٹ ( نئی تازہ ڈیسک) سیالکوٹ میں آج پنجاب اسمبلی کے حلقہ پی پی 52 پر ضمنی انتخابات ہو رہے ہیں۔ پولنگ کا عمل صبح 8 بجے شروع ہوا جو بغیر کسی وقفے کے شام 5 بجے تک جاری رہے گا۔
الیکشن کمیشن کے مطابق اس حلقے میں کل 2 لاکھ 97 ہزار 185 رجسٹرڈ ووٹرز ہیں۔ ان میں سے 1 لاکھ 57 ہزار 725 مرد ووٹرز اور 1 لاکھ 39 ہزار 460 خواتین ووٹرز ہیں۔
انتخابی عمل کو منظم اور آسان بنانے کے لیے حلقے میں مجموعی طور پر 185 پولنگ اسٹیشنز بنائے گئے ہیں۔ ان میں 57 مردوں کے لیے، 57 خواتین کے لیے اور 71 مشترکہ پولنگ اسٹیشنز شامل ہیں۔
یہ نشست مسلم لیگ (ن) کے رکن صوبائی اسمبلی چوہدری ارشد وڑائچ کے انتقال کے بعد خالی ہوئی تھی۔ اس ضمنی الیکشن میں 15 امیدوار حصہ لے رہے ہیں، جن میں اہم سیاسی جماعتوں کے نمایاں امیدوار بھی شامل ہیں۔
مسلم لیگ (ن) کی نمائندگی مرحوم رکن کی صاحبزادی حناء ارشد وڑائچ کر رہی ہیں۔ پاکستان تحریک انصاف کی فاخر نشاط گھمن میدان میں ہیں، جبکہ پاکستان پیپلز پارٹی کی جانب سے راحیل کامران چیمہ انتخابی دوڑ کا حصہ ہیں۔
سیالکوٹ پولیس نے انتخابی عمل کے دوران امن و امان کو یقینی بنانے کے لیے سخت حفاظتی انتظامات کیے ہیں۔ پولیس کے مطابق، دو ہزار سے زائد پولیس اہلکار، افسران اور ایلیٹ فورس کے جوان حلقے بھر میں سیکیورٹی ڈیوٹی پر مامور ہیں۔ خاص طور پر حساس پولنگ اسٹیشنز پر اضافی نفری تعینات کی گئی ہے
